மத்திய தொல்லியல் துறையின் கட்டுப்பாட்டில் உள்ள நினைவுச் சின்னங்களை மூட உத்தரவிடப்பட்டதை அடுத்து, தஞ்சை பெரிய கோவில், வேலூர் கோட்டை உள்ளிட்ட தமிழகத்திலுள்ள பிரசித்தி பெற்ற நினைவுச் சின்னங்கள் மூடப்பட்டுள்ளன.

கொரோனா இரண்டாவது அலை வேகமாக பரவி வருவதால் மத்திய அரசு தொல்லியல் துறையின் கீழ் இயங்கும் அனைத்து சுற்றுலா தளங்கள், கோவில்கள் மற்றும் நினைவுச்சின்னங்களை மெ 15-ம் தேதி வரை மூட மத்திய அரசு நேற்று உத்தரவிட்டது.

இதனைத் தொடர்ந்து, பிரசித்தி பெற்ற வேலூர் கோட்டை மூடப்பட்டு, பொதுமக்கள் யாரும் அனுமதிக்கப்படவில்லை. மேலும் வேலூர் கோட்டையிலுள்ள ஜலகண்டீஸ்வரர் ஆலயத்தில் இன்று பிரம்மோற்சவம் நடைபெற இருந்த நிலையில், விழா ரத்து செய்யப்பட்டு கோவில் மூடப்பட்டது. இதே போன்று, கோட்டையில் இருந்த இரண்டு அருங்காட்சியகங்களும் மூடப்பட்டன.

இதேபோன்று, தஞ்சை பெரிய கோவில் நுழைவு வாயிலும் மூடப்பட்டு, பக்தர்களுக்கு அனுமதி இல்லை என அறிவிப்பு பலகை வைக்கப்பட்டுள்ளது. கோயிலுக்கு வந்த பக்தர்கள் திருப்பி அனுப்பப்பட்டனர். கோயில் மூடப்பட்டாலும், ஆகம விதிப்படி, தினமும் நான்கு கால பூஜைகள் வழக்கம் போல் நடைபெறும் என அறநிலையத்துறையினர் தெரிவித்துள்ளனர்.

இதேபோல், அரியலூர் மாவட்டம், கங்கைகொண்ட சோழபுரத்திலுள்ள பிரகதீஸ்வரர் ஆலயமும் மூடப்பட்டது.