ஆப்பிரிக்க நாடான கேமரூனில் நிகழ்த்தப்பட்ட மனித வெடிகுண்டு தற்கொலைப்படைத் தாக்குதலில், 10 பேர் பரிதாபமாக உயிரிழந்தனர். பலர் காயமடைந்துள்ளனர்.

ஆப்பிரிக்க நாடுகளான நைஜீரியா, நைஜர், சாத், கேமரூன் உள்ளிட்ட நாடுகளில் போகோஹராம் தீவிரவாதிகள் ஆதிக்கம் செலுத்தி வருகின்றனர். அவ்வப்போது பெண்கள், குழந்தைகள் உள்ளிட்டவர்களை மனித வெடிகுண்டுகளாக பயன்படுத்தி, தீவிரவாதத் தாக்குதலை அரங்கேற்றி வருகின்றனர். இந்நிலையில், கேமரூனின் போட்டோகோல் நகரில் நிக்யூ கிராமம் அருகே 3 பெண் தீவிரவாதிகள் உட்பட 4 பேர் தற்கொலைப்படைத் தாக்குதலை நடத்தினர். தங்கள் உடல்களில் கட்டியிருந்த வெடிகுண்டுகளை வெடிக்கச் செய்தனர். இதில், அப்பாவி கிராம மக்கள் 10 பேர் பரிதாபமாக உயிரிழந்தனர். பலர் படுகாயமடைந்து, மருத்துவமனைகளில் அனுமதிக்கப்பட்டுள்ளனர். இந்தத் தாக்குதலை எந்த தீவிரவாத அமைப்பு நடத்தியது என்பது இதுவரை தெரியாத நிலையில், போகோஹராம் தீவிரவாதிகளே இதனை நிகழ்த்தியிருக்கலாம் என சந்தேகிக்கப்படுகிறது.