எவரெஸ்ட் மலை சிகரத்தில் பனிப்பாறை சரிந்து விழுந்ததில் மலையேறும் வழிகாட்டிகள் 10 பேர் உயிரிழந்து விட்டதாகவும், மலையேறும் வீரர்கள் பலர் காயமடைந்ததாகவும் தகவல்கள் தெரிவிக்கின்றன.

29 ஆயிரம் அடி உயரம் கொண்ட எவரெஸ்ட் மலையில் ஏறுவது சவால் நிறைந்ததாகும். இந்த சவாலை எதிர்கொள்ள ஆண்டுதோறும் உலகெங்கிலும் இருந்து நூற்றுக்கணக்கான மலையேறும் வீரர்கள் வருகிறார்கள். இதேபோன்று, நேபாளம் வழியாக எவரெஸ்ட் மலைச் சிகரத்தை அடைய புறப்பட்ட குழுவினர், 2-வது முகாமிற்கு சற்று தொலைவில் தங்கியிருந்த நிலையில், எதிர்பாராத வகையில் பனிப்பாறை சரிந்து விழுந்தது. இதில், மலையேறும் வழிகாட்டிகள் 10 பேர் பனிப்பாறையின் கீழே சிக்கி இறந்ததாகவும், பலர் காயமடைந்ததாகவும் தகவல்கள் தெரிவிக்கின்றன. காயமடைந்தவர்களில் 8 பேர் மீட்கப்பட்டனர். மற்றவர்களை மீட்கும் நடவடிக்கையில் மீட்புக்குழுவினரும், மலையடிவார முகாமில் தங்கியிருந்த மலையேறும் குழுவினரும் ஈடுபட்டுள்ளனர். அவர்களுக்கு உதவிட காட்மாண்டுவில் இருந்து ஹெலிகாப்டரும் விரைந்துள்ளது.