2021-ம் ஆண்டுக்கான மக்கள் தொகை கணக்கெடுப்பு 16 மொழிகளில் நடத்தப்பட உள்ளதாக மத்திய அரசு தெரிவித்துள்ளது.

2021-ம் ஆண்டுக்கான மக்கள் தொகை கணக்கெடுப்பில், மொபைல் செயலியை பயன்படுத்துவது குறித்து, நாடாளுமன்றத்தில் எழுப்பப்பட்ட கேள்விக்கு எழுத்துப்பூர்வமாக பதிலளித்த மத்திய உள்துறை இணை அமைச்சர் திரு.நித்யானந்த ராய், மக்கள் தொகை கணக்கெடுப்பு பணியில், தரவு சேகரிப்புக்கு மிக்ஸ் மோட் அணுகுமுறை பின்பற்றப்படவிருப்பதாக தெரிவித்துள்ளார்.

2020 ம் ஆண்டு ஏப்ரல் முதல் செப்டம்பர் வரை வீடமைப்பு பட்டியல் மற்றும் வீட்டுவசதி கணக்கெடுப்பு, 2021 ஆம் ஆண்டு பிப்ரவரி 09ம் தேதி முதல் 28 ஆம் தேதிவரை மக்கள் தொகை கணக்கீடு என இரண்டு கட்டங்களாக கணக்கெடுப்பு நடத்தப்படும் எனவும் தெரிவித்துள்ளார்.

16 மொழிகளில் இந்த மக்கள் தொகை கணக்கெடுப்பு நடைபெறும் எனவும், இதற்காக 8 ஆயிரத்து 754 கோடி ரூபாய் செலவாகும் என செலவு நிதி குழு கணக்கிட்டு இருப்பதாகவும் அவர் கூறியுள்ளார்.

கணக்கீட்டாளர்கள் ஸ்மார்ட் போனைப் பயன்படுத்தி மொபைல் ஆப் மூலம் நேரடியாக தரவைச் சேகரித்து சமர்ப்பிக்கலாம் அல்லது அவர்கள் காகித அட்டவணையைப் பயன்படுத்தி தரவைச் சேகரித்து மொபைல் ஆப் மூலம் சமர்ப்பிக்கலாம் என்றும் திரு.ராய் தெரிவித்துள்ளார்.