பெட்ரோல், டீசல் விலையை ஜி.எஸ்.டி. வரம்பிற்குள் கொண்டு வர மத்திய அரசு இதுவரை பரிந்துரை செய்யவில்லை என மத்திய அமைச்சர் திரு.அனுராக் தாக்கூர் தெரிவித்துள்ளார்.

நாடு முழுவதும் பெட்ரோல், டீசல் விலை வரலாறு காணாத விலையை எட்டியுள்ளது. பல்வேறு நகரங்களில் ஒரு லிட்டர் பெட்ரோல் விலை 100 ரூபாயைக் கடந்துள்ளது. பெட்ரோல், டீசல் விலையை கட்டுக்குள் கொண்டு வர மத்திய, மாநில அரசுகள் தனித்தனியாக வரி விதிப்பதை தவிர்த்து, ஜி.எஸ்.டி. வரம்பிற்குள் கொண்டு வர வேண்டுமென பல்வேறு தரப்பினரும் தொடர்ந்து வலியுறுத்தி வருகின்றனர். மேலும், பெட்ரோல், டீசல் விலை உயர்வு குறித்து நாடாளுமன்றத்தில் விவாதிக்க வேண்டுமென வலியுறுத்தியும், எதிர்க்கட்சிகளுக்கு அனுமதி அளிக்கப்படவில்லை. இதனிடையே, பெட்ரோல், டீசல் விலை உயர்வு குறித்து மாநிலங்களவையில் எழுத்துப்பூர்வமாக பதிலளித்த மத்திய நிதித்துறை இணை அமைச்சர் திரு.அனுராக் தாக்கூர், பெட்ரோல், டீசலை ஜி.எஸ்.டி. வரம்பிற்குள் கொண்டு வர, ஜி.எஸ்.டி. கவுன்சிலின் பரிந்துரை அவசியம் எனவும், இதுகுறித்து மத்திய அரசு இதுவரை பரிந்துரைக்கவில்லை எனவும் தெரிவித்துள்ளார்.