விளைபொருளுக்கான விலையை விவசாயிகளே நிர்ணயிக்கும் முறையை கொண்டுவரவேண்டும் என வலியுறுத்தி, கடலூர் மாவட்டம் விருத்தாசலம் வேளாண்மை விற்பனை கூட அலுவலகத்தை விவசாயிகள் முற்றுகையிட்டு போராட்டத்தில் ஈடுபட்டனர்.

கடலூர் மாவட்டம், விருத்தாசலம் வேளாண்மை விற்பனைக் கூடத்தில் அரசு நிர்ணயித்துள்ள அளவுப்படியும், தரத்தின்படியும் தரமான நெல்லுக்குரிய விலையினை அங்கு இருக்கும் வியாபாரிகள் வழங்கவில்லை என்றும், அனைத்து ரக நெல்லுக்கும் ஒரே விலையை நிர்ணயிப்பதால் தரமான நெல்லை கொண்டு வரும் விவசாயிகள் மிகுந்த பாதிப்புக்குள்ளாகிறார்கள் என்றும் புகார் எழுந்துள்ளது. இந்நிலையில், விளைபொருளுக்கான விலையை விவசாயிகளே நிர்ணயிக்கும் முறையை கொண்டு வரவேண்டும் என்று வலியுறுத்தி, விருத்தாசலம் வேளாண்மை விற்பனை கூட அலுவலகத்தை விவசாயிகள் முற்றுகையிட்டு போராட்டத்தில் ஈடுபட்டனர். பின்னர், அதிகாரியிடம் மனுவும் அளித்தனர்.

இதனிடையே, திருவாரூர் மாவட்டத்தில், அரசு நேரடி கொள்முதல் நிலையங்களில் சாக்கு தட்டுப்பாடு எனக்‍கூறி, அரிசி தட்டுப்பாட்டை ஏற்படுத்தி, வெளிமாநிலங்களில் இருந்து அரிசி கொள்முதல் செய்து அமைச்சர் மற்றும் அதிகாரிகள் ஊழல் செய்ய திட்டமிட்டுள்ளதாகவும், கிழிந்த சாக்குகள் கொள்முதல் செய்ததில் பெரும் ஊழல் நடைபெற்றுள்ளதாகவும் விவசாயிகள் குற்றம் சாட்டினர்.