தூத்துக்குடி தொகுதியில், தி.மு.க.வை சேர்ந்த கனிமொழி பெற்ற வெற்றியை எதிர்த்து தொடரப்பட்ட வழக்கை, தமிழிசை சவுந்தரராஜனுக்கு பதில், தூத்துக்குடி தொகுதி வாக்காளர் தொடர்ந்து நடத்த சென்னை உயர்நீதிமன்றம் அனுமதி அளித்துள்ளது.

தூத்துக்குடி மக்களவை தொகுதி எம்.பி. கனிமொழியின் வெற்றியை எதிர்த்து, தோல்வியடைந்த பாரதிய ஜனதா வேட்பாளர் தமிழிசை சவுந்தரராஜன் சென்னை உயர்நீதிமன்றத்தில் தேர்தல் வழக்கு தாக்கல் செய்தார். இந்த வழக்கு நிலுவையில் இருந்தபோது, தெலுங்கானா மாநில ஆளுனராக நியமிக்கபட்டதால், தேர்தல் வழக்கை திரும்ப பெற அனுமதி கோரி தமிழிசை சவுந்தரராஜன் தரப்பில் மனுத்தாக்கல் செய்யப்பட்டது. இதனைத்தொடர்ந்து, இந்த வழக்கை தொடர்ந்து நடத்த அனுமதி கோரி, ஸ்ரீவைகுண்டத்தை சேர்ந்த முத்து ராமலிங்கம் என்பவர் சென்னை உயர்நீதிமன்றத்தில் மனு தாக்கல் செய்தார். இந்த மனுவை விசாரித்த நீதிபதி எஸ்.எம் சுப்ரமணியம், தொகுதியின் வாக்காளர் என்பதை ஆதாரபூர்வமாக நிரூபித்துள்ளதால், தமிழிசை சவுந்தரராஜனுக்கு பதில் இவ்வழக்கை நடத்த முத்துராமலிங்கத்திற்கு அனுமதியளித்து உத்தரவிட்டார்.