தமிழகத்தில் காலியாக உள்ள திருவாரூர், திருப்பரங்குன்றம் தொகுதிகளுக்கு ஏன் தேர்தல் நடத்தவில்லை என தமிழகத் தேர்தல் அதிகாரிக்‍கு சென்னை உயர்நீதிமன்ற மதுரைக்‍ கிளை கேள்வி எழுப்பியுள்ளது.

திருவாரூர், திருப்பரங்குன்றம் தொகுதிகளுக்‍கு இடைத்தேர்தல் நடத்த உத்தரவிடக்‍கோரி, மதுரையைச் சேர்ந்த திரு. கே.கே. ரமேஷ் என்பவர் சென்னை உயர்நீதிமன்றக்‍ கிளையில் பொதுநல வழக்‍கு தொடுத்திருந்தார். இந்த வழக்‍கு நீதிபதிகள் திரு. சசிதரன்,​ திரு. ஆதிகேசவலு ஆகியோர் அடங்கிய அமர்வு முன்பாக இன்று விசாரணைக்‍கு வந்தது. தமிழகத்தில் இடைத்தேர்தல் நடத்துவதற்கு எடுக்‍கப்பட்ட நடவடிக்‍கைகள் என்ன என்பது குறித்து அப்போது நீதிபதிகள் கேள்வி எழுப்பினர். வடகிழக்‍குப் பருவமழை காரணமாக இருதொகுதிகளிலும் இடைத்தேர்தலை நடத்த வாய்ப்பில்லை என அரசுத் தரப்பில் கூறப்படுவதை ஏற்க முடியாது என்றும் நீதிபதிகள் தெரிவித்தனர்.

எனவே, இவ்விரு தொகுதிகளுக்‍கும் இடைத்தேர்தலை நடத்துவதற்கு செய்யப்பட்டிருக்‍கும் நடவடிக்‍கைகள் மற்றும் தேர்தலுக்‍கான கால அட்டவணை குறித்த விவரங்களை வரும் 26ம் தேதிக்‍குள் பதில் மனுவாக தாக்‍கல் செய்யவேண்டுமென தமிழக தேர்தல் அதிகாரிக்‍கு நீதிபதிகள் உத்தரவிட்டனர்.