முதலமைச்சர் செல்வி ஜெயலலிதா உத்தரவுப்படி, சிறப்புத் திட்டங்களின் கீழ், தமிழகத்தின் பல்வேறு பகுதிகளில் ஏழை-எளியோருக்கு நலத்திட்ட உதவிகள் தொடர்ந்து வழங்கப்பட்டு வருகின்றன.

நாகை மாவட்டம் மயிலாடுதுறை நகராட்சிக்கு உட்பட்ட 36 வார்டுகளைச் சேர்ந்த 21 ஆயிரம் பயனாளிகளுக்கு விலையில்லா மிக்சி, கிரைண்டர் மற்றும் மின்விசிறிகளை அமைச்சர் திரு. கே.ஏ. ஜெயபால் வழங்கினார். தொடர்ந்து, சீர்காழியில் 8,979 பயனாளிகளுக்கு விலையில்லா மிக்சி, கிரைண்டர் மற்றும் மின்விசிறிகளை அமைச்சர் வழங்கினார்.

திருவண்ணாமலை மாவட்டம், வந்தவாசியில் ஆயிரத்து 646 பயனாளிகளுக்கு விலையில்லா மிக்சி, கிரைண்டர் மற்றும் மின்விசிறிகளை அமைச்சர் முக்கூர் திரு. என். சுப்பிரமணியன் வழங்கினார்.

கன்னியாகுமரி மாவட்டம் நாகர்கோவிலில், இருளப்பபுரம் பகுதியில் நடைபெற்ற நிகழ்ச்சியில், ஆயிரத்து 962 பயனாளிகளுக்கு விலையில்லா மிக்சி, கிரைண்டர் மற்றும் மின்விசிறிகள் வழங்கப்பட்டன. இத்துடன், நாகர்கோவில் சட்டமன்றத் தொகுதியில் பயனாளிகளுக்கு விலையில்லா மிக்சி, கிரைண்டர், மின்விசிறிகள் வழங்கும் பணிகள் 100 சதவீதம் நிறைவடைந்துவிட்டதாகத் தெரிவிக்கப்பட்டுள்ளது.

திருவள்ளூர் மாவட்டம் திருவொற்றியூர், சண்முகா நகர், திருநகர் உள்ளிட்ட பகுதிகளில், 819 இல்லத்தரசிகளுக்கு விலையில்லா மிக்சி, கிரைண்டர் மற்றும் மின்விசிறிகள் வழங்கப்பட்டன.

இதனிடையே, நெல்லை மாவட்டம் பாளையங்கோட்டை அரசு மருத்துவமனையில், நேற்று பிறந்த குழந்தைகளுக்கு, "அம்மா குழந்தை நல பரிசுப் பெட்டகங்கள் வழங்கப்பட்டன. அ.இ.அ.தி.மு.க. மாநிலங்களவை குழு துணைத் தலைவர் திரு. எஸ். முத்துக்கருப்பன், திருமதி. விஜிலாசத்தியானந்த் M.P. உள்ளிட்டோர் கலந்துகொண்டனர். குழந்தை பிறந்த அன்றே 16 வகையான பொருட்கள் அடங்கிய பரிசுப் பெட்டகங்கள் வழங்கிய, முதலமைச்சர் செல்வி ஜெயலலிதாவுக்கு தாய்மார்கள் நெஞ்சார்ந்த நன்றி தெரிவித்துள்ளனர்.

ராமநாதபுரத்தில் இருந்து கலையனூர், பொட்டகவயல், திருப்புல்லாணியிலிருந்து கீழக்கரை, பெரியபட்டிணம், களிமண்குண்டு ஆகிய 5 புதிய வழித்தடங்களில் பேருந்து சேவை தொடக்கிவைக்கப்பட்டது. இந்நிகழ்ச்சியில், நாடாளுமன்ற உறுப்பினர் திரு. அன்வர்ராஜா மற்றும் கழக நிர்வாகிகள் கலந்துகொண்டனர்.