ஆதிதிராவிடர் மற்றும் பழங்குடியினர் சமுதாயத்தைச் சேர்ந்த மாணவர்கள், உயர்கல்வி பெற அரசு ஒதுக்‍கிய பணத்தை மீண்டும் செலவிடக்‍கோரி தொடரப்பட்ட வழக்‍கில், ஆதிதிராவிடர் மற்றும் பழங்குடியினர் நலத்துறை செயலாளர் பதிலளிக்‍க, சென்னை உயர்நீதிமன்ற மதுரைக்‍கிளை உத்தரவிட்டுள்ளது.

மதுரையை சேர்ந்த எஸ்.கார்த்திக் உயர் நீதிமன்ற மதுரை கிளையில் தாக்கல் செய்த மனுவில், ஆதிதிராவிடர் மற்றும் பழங்குடியினர் சமுதாயத்தைச் சேர்ந்த மாணவர்கள் பலருக்கும் உயர்கல்வி பெறுவதற்கான பொருளாதார தேவை, முழுமையாகப் பூர்த்தி செய்யப்படாத நிலையில், நலத்திட்டங்களுக்காக ஒதுக்கப்பட்ட தொகை பயன்படுத்தப்படாமல் திருப்பி ஒப்படைக்கப்பட்டிருப்பது அதிர்ச்சியை ஏற்படுத்தியுள்ளதாகத் தெரிவித்துள்ளார்.

கடந்த 5 ஆண்டுகளில் பல்வேறு நலத்திட்டங்களுக்காக ஒதுக்கிய தொகையில் பயன்படுத்தப்படாமல் 927 கோடியை அரசிடம் திரும்ப ஒப்படைத்துள்ளதாக தகவல்கள் வெளியாகியிருப்பதாகத் தெரிவிக்‍கப்பட்டுள்ளது. இந்த வழக்கு நீதிபதிகள் அப்துல்குத்தூஸ், ஸ்ரீமதி ஆகியோர் முன்பு விசாரணைக்கு வந்தது. இதுகுறித்து ஆதிதிராவிடர் மற்றும் பழங்குடியினர் நலத்துறை செயலாளர் 4 வாரத்தில் பதில் அளிக்க நோட்டீஸ் அனுப்பும்படி நீதிபதிகள் உத்தரவிட்டு, விசாரணையை ஒத்திவைத்தனர்.