தனியார் கல்லூரிகள் மூன்று தவணைகளாக கட்டணம் வசூலிக்‍க அனுமதிக்‍கப்படும் என சென்னை உயர்நீதிமன்றத்தில் தமிழக அரசு தெரிவித்துள்ளது.

கொரோனா ஊரடங்கால் தமிழகம் முழுவதும் தனியார் பள்ளிகளில் கல்வி கட்டணங்களை வசூலிக்கக்கூடாது என்று தமிழக அரசு கடந்த ஏப்ரல் 20ம் தேதி அரசாணை பிறப்பித்தது. இந்த அரசாணையை ரத்து செய்யக் கோரியும், அதற்கு தடை விதிக்கக் கோரியும் தமிழ்நாடு தனியார் பள்ளிகள் கூட்டமைப்பு மற்றும் அகில இந்திய தனியார் கல்வி நிறுவனங்கள் கூட்டமைப்புகள், கல்லூரிகள் சார்பில் சென்னை உயர்நீதிமன்றத்தில் வழக்கு தொடரப்பட்டது. தவணை முறையில் கட்டணம் வசூலிப்பது தொடர்பாக அரசுக்கு கோரிக்கை மனு அனுப்ப மனுதாரர்தரப்புக்‍கு உயர்நீதிமன்றம் அறிவுறுத்தியிருந்தது. இந்த வழக்கில், தமிழக உயர் கல்வித்துறை சார்பில் பதில் மனு தாக்‍கல் செய்யப்பட்டது. அதில், கலை அறிவியல் மற்றும் பொறியியல் கல்லூரிகளை திறப்பது குறித்து முவெடுக்காத நிலையில், கல்விக் கட்டணம் வசூலிப்பது தொடர்பான கேள்வியே எழவில்லை என தெரிவிக்‍கப்பட்டது.

மனுதாரர் தரப்பின் கோரிக்‍கையை ஏற்று, தனியார் கல்லூரிகள் ஆகஸ்ட், டிசம்பர் மற்றும் 2021 ஏப்ரல் என மூன்று தவணைகளாக கட்டணம் வசூலிக்க அனுமதிப்பது என முடிவு செய்துள்ளதாக தெரிவிக்கப்பட்டுள்ளது. இந்த வழக்கு நீதிபதி ஆனந்த் வெங்கடேஷ் முன்னிலையில் நாளை விசாரணைக்கு வருகிறது.