பொங்கல் பண்டிகை முடிந்து பல்லாயிரக்‍கணக்‍கானோர் ஒரே நேரத்தில் சென்னை திரும்பியதால், இன்று அதிகாலையிலிருந்து மதுராந்தகம், செங்கல்பட்டு, பெருங்களத்தூர் பகுதிகளில் வாகன நெரிசல் தொடர்ந்து நீடிக்‍கிறது.

பொங்கல் பண்டிகையை முன்னிட்டு சொந்த ஊர் சென்ற பலரும் நேற்று மாலையில் தமிழகத்தின் பல்வேறு பகுதிகளிலிருந்த சென்னை நோக்‍கி புறப்பட்டனர். இதன் காரணமாக பேருந்து மற்றும் ரயில்களில் கூட்டம் அதிகமாக இருந்தது. சாலை மார்க்கமாக ஏராளமான வாகனங்கள் அணிவகுத்ததால், மதுராந்தகம் தொடங்கி தாம்பரம் வரை கடும் போக்குவரத்து நெரிசல் ஏற்பட்டுள்ளது. இதனால் வாகனங்கள் அனைத்தும் அங்குலம் அங்குலமாக நகரும் நிலை நீடிக்‍கிறது. செங்கல்பட்டு, பரனூர் சுங்கச்சாவடி, மறைமலைநகர், கூடுவாஞ்சேரி, வண்டலூர், பெருங்களத்தூர் ஆகிய பகுதிகளில் போக்குவரத்து நெரிசல் கடுமையாக உள்ளது. இதனைத் தவிர்க்க அங்குள்ள சுங்கச்சாவடிகளில் வாகனங்கள் கட்டணமின்றி அனுமதிக்கப்பட்டுள்ளன. மேலும் கனரக வாகனங்களும், பேருந்துகளும் நெமிலிச்சேரி பைபாஸ் சாலையில் திருப்பி விடப்பட்டுள்ளன.