முதலமைச்சர் செல்வி ஜெயலலிதாவின் முன்னோடித் திட்டங்களில் ஒன்றான, "அம்மா உணவகங்களை" பார்வையிட்ட சண்டிகர் மாநகர மேயர் தலைமையிலான குழுவினர், இதேபோன்ற உணவகங்களை சண்டிகரில் விரைவில் தொடங்க இருப்பதாக அவர்கள் தெரிவித்துள்ளனர்.

தமிழகத்தில் 3-வது முறையாக ஆட்சிப் பொறுப்பேற்று, எண்ணற்ற மக்கள்நலத் திட்டங்களை முதலமைச்சர் செல்வி ஜெ ஜெயலலிதா செயல்படுத்தி வருகிறார். முதலமைச்சர் செல்வி ஜெயலலிதாவின் முன்னோடித் திட்டங்களில் ஒன்று, "அம்மா உணவகம்" ஆகும். ஒரு ரூபாய்க்கு இட்லி, 5 ரூபாய்க்கு சாம்பார் சாதம், எலுமிச்சை சாதம், 3 ரூபாய்க்கு தயிர் சாதம் என ஏழை - எளிய மக்கள் தரமான உணவு வகைகளை வயிறார உண்ணும் வகையில், அம்மா உணவகங்கள் சென்னை உட்பட தமிழகம் முழுவதும் அனைத்து மாநகராட்சிகளிலும் சிறப்பாக செயல்பட்டு வருகின்றன. அம்மா உணவகங்களுக்கு பல்வேறு மாநில அரசுகள் பாராட்டு தெரிவித்து வருகின்றன.

இந்நிலையில், சண்டிகர் மாநகர மேயர் திரு. ஹர்பூல் சந்தர் கல்யாண் தலைமையிலான 25 பேர் கொண்ட குழுவினர், சென்னை அரசு மருத்துவமனை வளாகத்தில் உள்ள அம்மா உணவகத்தை பார்வையிட்டனர். அங்கு தயாரிக்கப்பட்டு வழங்கப்படும் உணவு வகைகளை அவர்கள் சாப்பிட்டு பார்த்து, பாராட்டு தெரிவித்தனர். உணவுகள் சுகாதாரமான முறையில் தயாரிக்கப்படுவதாகவும், இதுபோன்ற குறைந்த விலை அம்மா உணவகங்களை சண்டிகரிலும் தொடங்குவது குறித்து விரைவில் முடிவு செய்யப்படும் என்றும் சண்டிகர் மேயர் மற்றும் அவருடன் வந்துள்ள அம்மாநில அதிகாரிகள் தெரிவித்துள்ளனர்.