ஸ்டெர்லைட் துப்பாக்கி சூடு சம்பவம் தொடர்பாக தமிழக அரசிடம் தாக்கல் செய்துள்ள அறிக்கையை மக்கள் பார்வைக்கு உடனடியாக வெளியிட வேண்டும் என ஸ்டெர்லைட் ஆலை எதிர்ப்பு மக்கள் கூட்டமைப்பு அரசுக்கு கோரிக்கை விடுத்துள்ளது.

தூத்துக்குடியில் சுற்றுச்சூழலுக்கு மாசு ஏற்படுத்தும் வகையில் செயல்பட்டு வந்த ஸ்டெர்லைட் ஆலைக்கு எதிராக தன்னெழுச்சி போராட்டம் நடத்தியவர்கள் மீது போலீசார் துப்பாக்கி சூடு நடத்தினர். இதில் 13 பேர் பலியானதுடன் நூற்றுக்கும் மேற்பட்டோர் காயமடைந்தனர். இந்த துப்பாக்கி சூடு சம்பவம் பற்றி விசாரணை நடத்த ஓய்வு பெற்ற நீதிபதி அருணா ஜெகதீசன் தலைமையில் ஒருநபர் ஆணையம் அமைக்கப்பட்டது.

சுமார் 4 ஆண்டுகளாக விசாரணை நடத்திய இந்த ஆணையம் நேற்று தனது அறிக்கையை தமிழக அரசிடம் சமர்ப்பித்தது. இந்நிலையில் ஒரு நபர் ஆணையத்தின், விசாரணை அறிக்கையை தமிழக அரசு உடனடியாக பொதுமக்கள் பார்வைக்கு வெளியிட வேண்டும் என ஸ்டெர்லைட் ஆலை எதிர்ப்பு மக்கள் கூட்டமைப்பு அரசுக்கு கோரிக்கை விடுத்துள்ளது.