அமெரிக்காவில் டெக்சாஸ் மாகாணத்தில் வீசிய கடுமையான சூறாவளியில் சிக்கி 5 பேர் உயிரிழந்தனர். பலர் படுகாயமடைந்தனர்.

அமெரிக்காவின் டெக்ஸாஸில் ஒவ்வொரு ஆண்டும் கடுமையான சூறாவளிக் காற்று வீசி பெருத்த சேதத்தை ஏற்படுத்தி வருகிறது. அங்கு பருவநிலை மாற்றம் கடுமையாக இருப்பதால் சேதமும் பெரிய அளவில் ஏற்படுகிறது. இந்நிலையில், கடற்கரை மாகாணமான டெக்ஸாஸில் உள்ள டல்லாஸ் பகுதியில் நேற்று வீசிய கடுமையான சூறாவளிக் காற்றால் அந்நகரமே பெருத்த சேதத்தை சந்தித்துள்ளது. இந்த சூறாவளிக் தாக்குதலில் சிக்கி 5 பேர் வரை உயிரிழந்தனர். பலத்த காற்று மற்றும் கனமழையால் ஏராளமானோர் வீடுகளை இழந்துள்ளனர். கார்கள் தூக்கி வீசப்பட்டு பலத்த சேதமடைந்தன. Canton பகுதியை 3 கடுமையான சூறாவளிப் புயல் தாக்கியுள்ளதாக அம்மாகாண வானிலை ஆய்வு மையம் உறுதிப்படுத்தியுள்ளது. இப்பகுதியில் சூறாவளியால் பாதிக்கப்பட்ட சுமார் 50 பேர் மருத்துவமனையில் அனுமதிக்கப்பட்டு சிகிச்சை பெற்று வருகின்றனர். டெக்சாஸ் மாகாண கவர்னர் கிரெக் அப்போட் ஆங்காங்கே சிக்கியிருப்பவர்களை மீட்க 2 மீட்புப்படை அனுப்பப்பட்டுள்ளதாக தெரிவித்துள்ளார்.