கியூபா நாட்டின் மறைந்த முன்னாள் அதிபர், பிடல் காஸ்ட்ரோவின் விருப்பப்படி, அவரது உடல் கடந்த ஞாயிறன்று தகனம் செய்யப்பட்டது. இதனைத்தொடர்ந்து, தலைநகர் ஹவானாவில் இருந்து, அவரது அஸ்தியின் ஒரு பகுதி, பொதுமக்கள் அஞ்சலி செலுத்துவதற்காக கியூபா முழுவதும் பல்வேறு நகரங்களுக்கு ஊர்வலமாகக் கொண்டு செல்லப்பட்டு வருகிறது. கியூபாவில், பிடல் காஸ்ட்ரோ தலைமையில் புரட்சி நடந்தபோது, கொரில்லா படைகள் பெரும் வெற்றி பெற்ற, சாண்டா கிளாரா நகரில் உள்ள சே குவேராவின் நினைவகத்தில் காஸ்ட்ரோவின் அஸ்தி பெட்டி வைக்கப்பட்டது. அப்போது, லட்சக்கணக்கான மக்கள் திரண்டு, காஸ்ட்ரோவுடன் சேர்ந்து, சே குவேராவுக்கும் அஞ்சலி செலுத்தினர்.

இதனிடையே, மத்திய உள்துறை அமைச்சர் திரு.ராஜ்நாத் சிங் தலைமையில், மக்களவை துணைத் தலைவரும், அ.இ.அ.தி.மு.க உறுப்பினருமான டாக்டர் மு.தம்பிதுரை உள்ளிட்ட ஏழு எம்.பி.க்கள் அடங்கிய குழுவினர் கியூபா சென்றனர். அங்கு பிடல் காஸ்ட்ரோவுக்கு அஞ்சலி செலுத்தினர்.

வரும் 4-ம் தேதி, சாண்டியாகோ நகரில், காஸ்ட்ரோவின் கல்லறைக்கு அஸ்தி கொண்டு வரப்பட்டு இறுதிச் சடங்கு நடைபெறுகிறது.