அஃப்கனிஸ்தானில் அமெரிக்கன் பல்கலைக் கழகத்திற்குள் நுழைந்து தீவிரவாதிகள் நடத்திய கண்மூடித் தாக்குதலில் 7 பேர் உயிரிழந்தனர். 30க்கும் மேற்பட்டோர் காயமடைந்தனர்.

தலைநகர் காபூலில் உள்ள அமெரிக்கன் பல்கலைக் கழகத்தில், ஆயிரத்து 700-க்கும் மேற்பட்ட மாணவர்கள் பயின்று வருகின்றனர். இப்பல்கலைக் கழகத்திற்குள் நேற்று மாலை நுழைந்த தீவிரவாதிகள், அங்கிருந்தவர்கள் மீது துப்பாக்கியால் சுட்டும் குண்டுகளை வீசியும் தாக்குதல் நடத்தினர். பல்கலைக் கழக வளாகமே புகை மண்டலமாகக் காட்சியளித்தது. இதனால் அச்சமடைந்த மாணவர்கள் அலறி அடித்தபடி வகுப்பறைகளில் தஞ்சமடைந்தனர். உடனடியாக பல்கலைக் கழக வளாகத்தை சுற்றிவளைத்த அஃப்கனிஸ்தான் பாதுகாப்புப் படையினர், அங்கு சிக்கியுள்ளவர்களை மீட்கும் நடவடிக்கையில் ஈடுபட்டனர். இத்தாக்குதலில் 7 பேர் உயிரிழந்தனர். படுகாயத்துடன் மீட்கப்பட்ட 30க்கும் மேற்பட்டோர் மருத்துவமனையில் அனுமதிக்கப்பட்டனர். தப்பியோடிய தீவிரவாதிகளை தேடும் பணி தீவிரமாக நடைபெற்று வருகிறது. இத்தாக்குதலுக்கு இதுவரை எந்தவொரு தீவிரவாத அமைப்பும் பொறுப்பேற்கவில்லை.