வானிலை காரணமாக ஒரு மாத காலம் ஜப்பானில் நிறுத்தி வைக்கப்பட்டிருந்த முதலாவது சூரிய சக்தி விமானம், மீண்டும் ஜப்பானில் இருந்து ஹவாய் தீவை நோக்கி தனது பயணத்தைத் தொடங்கியுள்ளது.

உலகில் முதல் முறையாக சூரிய சக்தி மூலம் இயங்கும் Solar Impulse-2 என பெயரிடப்பட்டுள்ள விமானம், அபுதாபியில் இருந்து புறப்பட்டு இந்தியா, சீனா உள்ளிட்ட நாடுகளுக்கு பயணம் மேற்கொண்டு ஜப்பானுக்கு சென்றது. ஜப்பானிலிருந்து அமெரிக்காவின் ஹவாய் தீவிற்கு பசிபிக்கடல் வழியாக பயணம் மேற்கொள்ள திட்டமிடப்பட்டிருந்தது. ஆனால் மோசமான வானிலை காரணமாக பயணம் ரத்து செய்யப்பட்டது. சுமார் ஒரு மாத காலமாக இந்த விமானம் ஜப்பானில் நிறுத்தி வைக்கப்பட்டிருந்தது.

பசிபிக் பெருங்கடல் பகுதியில் வானிலை தற்போது சாதகமாக இருப்பதால், சூரிய சக்தி விமானம், ஜப்பானிலிருந்து ஹவாய் தீவிற்கு தனது பயணத்தைத் தொடங்கியுள்ளது. இந்த விமானம் மணிக்கு 30 முதல் 60 கீலோ மீட்டர் வேகத்தில் செல்லும் என்றும், இந்த பயணம் சவாலானதாக இருக்கும் என்றும் விமானிகள் தெரிவித்தனர். இந்த விமானம், மொத்தம் 35 ஆயிரம் கிலோ மீட்டர் பயணம் மேற்கொண்டு உலகை சுற்றிவர உள்ளது என்பது குறிப்பிடத்தக்கது.