பிரிட்டனில் பரவி வரும் உருமாற்றமடைந்த கொரோனா வைரஸ் மிகவும் ஆபத்தானது என அந்நாட்டு பிரதமர் போரிஸ் ஜான்சன் தெரிவித்துள்ளார்.

ஐரோப்பிய நாடான பிரிட்டனில், அண்மையில் உருமாற்றமடைந்த கொரோனா வைரஸ் பரவல் கண்டுபிடிக்கப்பட்டது. இதையடுத்து, அந்நாட்டில் மீண்டும் ஊரடங்கு அமல்படுத்தப்பட்டது. இந்தியா, சீனா உள்ளிட்ட 60-க்கும் மேற்பட்ட நாடுகளில், உருமாற்றமடைந்த கொரோனா பரவியுள்ளது. பிரிட்டனில் தீவிரமாகப் பரவி வரும் உருமாற்றமடைந்த வைரஸ் தொற்றால், பல மருத்துவமனைகளில் நோயாளிகளின் எண்ணிக்கை அதிகரித்து வருவதுடன், உயிரிழப்பும் அதிகரித்து வருகிறது.

இந்நிலையில், இது தொடர்பாக பேட்டியளித்த பிரிட்டன் பிரதமர் போரிஸ் ஜான்சன், விஞ்ஞானிகளின் ஆய்வின்படி, உருமாற்றமடைந்த கொரோனா பரவல், மிகவும் ஆபத்த‌ான உயிர்க்கொல்லி என தெரிய வந்துள்ளதாகவும், இது வேகமாகப் பரவக்கூடியது என்றும் தெரிவித்தார்.

பிரிட்டனில் பொதுமக்களுக்கு போடப்பட்டு வரும் இரண்டு தடுப்பூசிகளு‍மே உருமாற்றமடைந்த கொரோனாவுக்கு எதிராக செயல்படும் திறன் கொண்டவை என்றும் பிரதமர் போரிஸ் ஜான்சன் குறிப்பிட்டார்.