உலகின் மிகவும் பிரபலமான `America's Got Talent' நிகழ்ச்சியில் இந்தியாவை சேர்ந்த நடனக்‍குழு வாகை சூடியுள்ளது.

அமெரிக்காவில் பன்முகத் தன்மையை வெளிப்படுத்துவதற்காக America's Got Talent என்ற தலைப்பில் பிரம்மாண்ட நிகழ்ச்சி ஒன்று நடைபெற்றது. உலகம் முழுவதும் இருந்து 40 நாடுகளைச் சேர்ந்த போட்டியாளர்கள் கலந்துகொண்டனர். பல்வேறு சுற்றுகளாக நடைபெற்ற போட்டியில் இந்தியாவிலிருந்து பங்கேற்ற Unbeatable என்ற மும்பை நடனக்‍குழு வாகை சூடியது. பொருளாதாரத்தில் பின்தங்கிய 29 இளைஞர்களைக்‍ கொண்ட இக்குழு, கடந்த ஆண்டும் இதே போட்டியில் 4வது இடத்தை பிடித்திருந்த நிலையில், இம்முறை முதலிடத்தைப் பெற்றுள்ளது. தர்பார் படத்தின் மரண மாஸ் பாடலுக்‍கு ஏற்ப இக்‍குழுவினர் நடனமாடியது ரசிகர்களை கவர்ந்தது. இக்‍காட்சி சமூக வலைதளங்களிலும் வைரலாகி உள்ளது.

22 வயதான விகாஸ் என்ற சக நடனக்‍ கலைஞரை விபத்து ஒன்றில் இழந்த நிலையில், போட்டியில் பங்கேற்ற மும்பை குழுவினர் அவரது முதல் எழுத்தான "வி" என்பதை தனது குழுவினர் பெயருடன் இணைத்து, V-Unbeatable என்ற தலைப்பில் களமிறங்கினர். இழந்த சக நடனக்‍ கலைஞரை நேசித்த மும்பை குழுவினர் பெற்ற வெற்றிக்‍கு ரன்வீர் சிங் உட்பட பாலிவுட் நடிகர்கள் பலரும் சமூக வலைதளங்களில் வாழ்த்துகளைத் தெரிவித்து வருகின்றனர்.