மாண்புமிகு அம்மாவின் மூன்றாம் ஆண்டு நினைவுநாளையொட்டி, சென்னை கடற்கரையில் உள்ள அம்மாவின் நினைவிடத்தில், அம்மா மக்கள் முன்னேற்றக் கழக பொதுச்செயலாளர் திரு.டிடிவி தினகரன், மலர் வளையம் வைத்து மரியாதை செலுத்தினார். இந்நிகழ்ச்சியில் அ.ம.மு.க. நிர்வாகிகளும், பல்லாயிரக்‍கணக்‍கான தொண்டர்களும் பங்கேற்றனர்.

இறுதி மூச்சு வரை தமிழகத்தின் நலனையே மனதில் கொண்டு செயல்பட்டு ஒப்பற்ற ஆளுமையாக விளங்கிய மாண்புமிகு அம்மாவின் மூன்றாம் ஆண்டு நினைவு தினம் இன்று கடைப்பிடிக்கப்படுகிறது. இதையொட்டி சென்னை அண்ணா சாலையில் அமைந்துள்ள பேரறிஞர் அண்ணாசிலை அருகில் இருந்து, அம்மா மக்கள் முன்னேற்ற கழகப் பொதுச்செயலாளர் திரு. டிடிவி தினகரன் தலைமையில், பல்லாயிரக்‍கணக்‍கான கழகத் தொண்டர்களும், பொதுமக்‍களும் மௌன ஊர்வலம் சென்றனர்.

புரட்சித் தலைவி அம்மா துயில் கொள்ளும் மெரினா கடற்கரை நினைவிடத்தில், கழகப் பொதுச்செயலாளர் திரு.டிடிவி தினகரன், மலர்தூவியும், மலர்வளையம் வைத்தும் மரியாதை செலுத்தினார். இதைத் தொடர்ந்து டிடிவி தினகரன் தலைமையில் அ.ம.மு.க.வினர் உறுதிமொழி ஏற்றனர்.

இதில், கழக துணைத் தலைவர் திரு. அன்பழகன், கழக துணைப் பொதுச் செயலாளர்கள் திரு. P.பழனியப்பன், திரு. ரங்கசாமி, கழக தேர்தல் பிரிவுச் செயலாளர்கள் திரு. செந்தமிழன், மாணிக்‍கராஜா, கழகப் பொருளாளர் திரு. வெற்றிவேல், கழக கொள்கைபரப்புச் செயலாளர் செல்வி சி.ஆர். சரஸ்வதி உள்ளிட்ட தலைமைக்கழக நிர்வாகிகள், மாவட்டக் கழகச் செயலாளர்கள், நிர்வாகிகள், மாவட்ட சார்பு அணிகளின் செயலாளர்கள், நிர்வாகிகள், பகுதி, ஒன்றிய, நகர, பேரூர், வட்ட, ஊராட்சி, கிளைக்கழகம் மற்றும் சார்பு அணிகளின் நிர்வாகிகள், கழகத் தொண்டர்கள் மற்றும் பொதுமக்கள் பெருந்திரளாக கலந்துகொண்டனர்.