குரூப்-2 தேர்வினை பழைய முறையிலேயே நடத்த பரிசீலனை செய்ய வேண்டுமென தமிழக அரசுக்கு உயர்நீதிமன்ற மதுரைக்‍கிளை உத்தரவிட்டுள்ளது.

மதுரையைச் சேர்ந்த அப்பாஸ் மந்திரி என்பவர், உயர்நீதிமன்ற மதுரைக்கிளையில் பொதுநல மனு ஒன்றை தாக்‍கல் செய்திருந்தார். அதில், சமீபத்தில் குரூப்-2 தேர்வுகளுக்கான புதிய பாடத் திட்டத்தில், 175 வினாக்கள் பொது அறிவியலில் இருந்தும், 25 வினாக்கள் கணிதத்தில் இருந்தும் கேட்கப்படும் என குறிப்பிடப்பட்டுள்ளது. தமிழகத்தில் ஆயிரக்கணக்கான இளைஞர்கள், மாற்றுத்திறனாளிகள் குரூப்-2 தேர்விற்காக தயார் செய்து வரும் நிலையில், பழைய பாட திட்டத்தில் உள்ள 100 மதிப்பெண்களுக்‍கான தமிழ் வினாக்கள் அகற்றப்பட்டதால், அவர்கள் மிகுந்த சிரமத்திற்கு ஆளாக நேரிடும் என்றும், அதே போல் குரூப்-2 மெயின் தேர்வில், 100 மதிப்பெண்களுக்கு தமிழில் இருந்து ஆங்கிலத்திற்கும், ஆங்கிலத்திலிருந்து தமிழுக்கும் மொழி பெயர்க்கும் வகையில் வினாக்கள் அமைக்கப்பட்டுள்ளது, கிராமப்புறத்தைச் சேர்ந்த மாணவர்களை பெருமளவில் பாதிக்கும் எனவும் தெரிவிக்‍கப்பட்டுள்ளது. ஆகவே, குரூப்-2 தேர்விற்கான புதிய பாடத்திட்டத்தை ரத்து செய்து, பழைய முறையிலேயே தேர்வை நடத்த உத்தரவிட வேண்டும் என மனுவில் கோரப்பட்டிருந்தது. இந்த வழக்கை விசாரித்த நீதிபதிகள் திரு. சிவஞானம், திரு. கிருஷ்ணன் ராமசாமி அடங்கிய அமர்வு, மனு குறித்து, தமிழக அரசு பரிசீலனை செய்ய உத்தரவிட்டு வழக்கை முடித்து வைத்தது.