விஜய் நடித்துள்ள பிகில் படத்திற்கு தடை கோரி கே.பி.செல்வா என்பவர் சென்னை உயர்நீதிமன்றத்தில் வழக்கு தொடர்ந்துள்ளார்.

தெறி, மெர்சல் திரைப்படங்களை தொடர்ந்து, நடிகர் விஜய், இயக்குனர் அட்லீ கூட்டணியில் பிகில் திரைப்படம் உருவாகியுள்ளது. பெண்கள் கால்பந்து விளையாட்டை மையமாக வைத்து எடுக்கப்பட்டுள்ள இப்படத்தை ஏஜிஎஸ் என்டர்டெயின்மெண்ட் நிறுவனம் தயாரித்துள்ளது. இப்படம் தீபாவளிக்கு வெளியாக உள்ளது. இதனிடையே திரைப்பட உதவி இயக்குனர் கே.பி.செல்வா என்பவர், தன்னுடைய கதையை திருடி பிகில் திரைப்படம் எடுக்கப்பட்டுள்ளதாகவும், படத்திற்கு தடை கோரியும் சென்னை உரிமையியல் நீதிமன்றத்தில் வழக்கு தொடர்ந்திருந்தார். இந்த வழக்கு தள்ளுபடி செய்யப்பட்ட நிலையில், தற்போது அவர் சென்னை உயர்நீதிமன்றத்தில் வழக்கு தொடர்ந்துள்ளார். இந்த வழக்‍கை விசாரித்த நீதிபதிகள் இயக்‍குனர் அட்லி மற்றும் தயாரிப்பாளர் கல்பாத்தி எஸ்.அகோரம் ஆகியோர் இதுகுறித்து பதிலளிக்‍கக்‍கோரி உத்தரவிட்டு வழக்கு விசாரணையை நாளைக்‍கு ஒத்திவைத்தனர்.