திருவண்ணாமலையில், செயற்கை கருவூட்டல் செய்வதாகக் கூறி, 3 லட்சம் ரூபாய் ஏமாற்றிய தனியார் மருத்துவமனை முன்பு, பாதிக்‍கப்பட்ட தம்பதியினர் குடும்பத்துடன் போராட்டம் நடத்தினர்.

திருவண்ணாமலை அடுத்த ஓரந்தவாடி கிராமத்தைச் சேர்ந்த விவசாயி சிவகுமார் - உமா தம்பதியினரின் 2 குழந்தைகள், கடந்த கடந்த சில ஆண்டுகளுக்‍கு முன்பு, ஆற்றில் குளிக்கும்போது அடித்துச் செல்லப்பட்டு உயிரிழந்தனர். இதனால், மீண்டும் குழந்தை வரம் வேண்டி முயற்சித்த நிலையில், சின்னகடைத் தெருவில் உள்ள தனியார் மருத்துவமனையை அணுகியுள்ளனர். செயற்கை கருவூட்டல் முறையில் கருத்தரிப்பு செய்வதாகக் கூறி, மருத்துவமனை நிர்வாகம் 3 லட்சம் ரூபாயை அவர்களிடம் இருந்து வசூலித்துள்ளனர். ஆனால் கடந்த 5 மாதங்களுக்கும் மேலாகியும் சிகிச்சையில் முன்னேற்றம் இல்லாததால், விரக்தியடைந்த தம்பதியினர், பணத்தை திரும்ப கேட்டு, உறவினர்களுடன் மருத்துவமனை முன்பாக தரையில் அமர்ந்து போராட்டத்தில் ஈடுபட்டனர். அப்போது பாதிக்‍கப்பட்ட பெண் உமா மயக்‍கமடைந்ததால், பரபரப்பு நிலவியது. சம்பவம் குறித்து காவல்துறையினர் விசாரணை நடத்தி வருகின்றனர்.