சேலம் உருக்‍காலையை தனியார் மயமாக்‍கும் மத்திய அரசின் முயற்சிக்‍கு எதிர்ப்பு தெரிவித்து, அனைத்து தொழிற்சங்கங்கள் நடத்திய உண்ணாவிரதப் போராட்டத்திற்கு, அம்மா மக்‍கள் முன்னேற்ற கழகம் ஆதரவு தெரிவித்துள்ளது.

மத்தியில் மீண்டும் பாரதிய ஜனதா அரசு பொறுப்பேற்ற பின்னர், பொதுத்துறை நிறுவனங்களை தனியாருக்கு தாரைவார்க்கும் முயற்சியில் ஈடுபட்டு வருகிறது. சேலம் உருக்‍காலையை, தனியாருக்‍கு தாரைவார்க்‍கும் முயற்சிக்‍கு தொழிலாளர்கள் எதிர்ப்பு தெரிவித்து, ஒரு மாத காலமாக தொடர்ந்து பல்வேறு போராட்டங்களில் ஈடுபட்டு வருகின்றனர். இந்நிலையில், சேலம் உருக்‍காலையின் பங்குகளை விற்பனை செய்ய, டெண்டருக்‍கு அழைப்பு விடுக்‍கப்பட்டுள்ளது. இதனை கண்டித்து, மாவட்ட ஆட்சியர் அலுவலகம் அருகே, அனைத்து தொழிற்சங்கங்கள் பங்கேற்ற, மாபெரும் உண்ணாவிரத போராட்டம் நடைபெற்றது. இப்போராட்டத்திற்கு, அம்மா மக்கள் முன்னேற்ற கழகத்தினர், நேரில் சென்று தங்களின் ஆதரவை தெரிவித்து, உண்ணாவிரத போராட்டத்தில் கலந்து கொண்டனர். இதில், சேலம் புறநகர் மாவட்ட செயலாளர் திரு. எஸ்.கே செல்வம், சேலம் மத்திய மாவட்ட செயலாளர் திரு. வெங்கடாசலம், சேலம் மேற்கு மாவட்ட செயலாளர் திரு. மாதேஷ் உள்ளிட்ட கழக நிர்வாகிகள் கலந்து கொண்டனர்.