தமிழகத்தில் மருத்துவ மாணவர் சேர்க்கைகான கலந்தாய்வில் பங்கேற்ற வெளிமாநிலத்தவர் 126 பேருக்கு, நோட்டீஸ் அனுப்ப உயர்நீதிமன்ற மதுரைக்கிளை உத்தரவிட்டுள்ளது.

தமிழகத்தில் 2019- 2020 ஆம் ஆண்டிற்கான மருத்துவ மாணவர் சேர்க்கைக்கு நடைபெற்று வரும் கலந்தாய்வை ரத்து செய்யக் கோரி, மதுரையை சேர்ந்த மாணவர்கள் உயர்நீதிமன்ற மதுரைக்கிளையில் மனு தாக்கல் செய்திருந்தனர். அதில், தமிழகத்தில் உள்ள 23 அரசு மருத்துவ கல்லூரிகளில் 2 ஆயிரத்து 744 இடங்கள் தமிழக மாணவர்களுக்கு ஒதுக்கப்பட்டுள்ள நிலையில், இந்த ஆண்டு 126 வெளிமாநில மாணவர்கள் கலந்தாய்வில் பங்கேற்றுள்ளனர் என்று குறிப்பிட்டுள்ளனர். மேலும் மருத்துவ கல்லூரி மாணவர் சேர்க்கை கலந்தாய்வு பட்டியலில் இருந்து வெளிமாநில மாணவர்களை நீக்க உத்தரவிட வேண்டும் என கோரிக்கை விடுத்திருந்தனர். இந்த மனு நீதிபதி சுரேஷ்குமார் முன்பு மீண்டும் விசாரணைக்கு வந்தது, அப்போது வெளி மாநில மாணவர்கள் 126 பேர் எதன் அடிப்படையில் கலந்தாய்வில் கலந்துகொண்டனர் என்று கேள்வி எழுப்பினார். மேலும் அவர்களின் இருப்பிட சான்று குறித்து பதிலளிக்க நோட்டீஸ் அனுப்ப உத்தரவிட்டு, வழக்கை ஆகஸ்ட் 26 ம் தேதிக்கு ஒத்திவைத்தார்.