உதவித்தொகையை உயர்த்தி வழங்கக் கோரி, தமிழகம் முழுவதும் போராட்டத்தில் ஈடுபட்டுள்ள பயிற்சி மருத்துவர்களை உடனடியாக தமிழக அரசு அழைத்து பேச்சுவார்த்தையின் மூலம் சுமூக தீர்வு காண வேண்டும் என சமூக சமத்துவத்திற்கான டாக்டர்கள் சங்கம் வலியுறுத்தியுள்ளது.

சென்னையில் இன்று செய்தியாளர்களுக்குப் பேட்டியளித்த அச்சங்கத்தின் பொதுச் செயலாளர் டாக்டர் ஜி.ஆர். ரவீந்திரநாத், நீட் தேர்விலிருந்து தமிழகத்திற்கு முழு விலக்கு பெற வேண்டிய தமிழக அரசு, தனது கடமையை தட்டிக் கழிப்பதாக குற்றம்சாட்டினார். நீட் தேர்வு தொடர்பாக, தமிழக சட்டமன்றத்தில் நிறைவேற்றப்பட்ட 2 மசோதாக்களின் நிலை என்ன என்றும் அவர் கேள்வி எழுப்பினார். அரசு மருத்துவர்களின் ஓய்வு பெறும் வயது வரம்பை 65-ஆக உயர்த்தினால், வேலைக்காக காத்திருக்கும் ஆயிரக்கணக்கான இளம் மருத்துவர்களின் வேலைவாய்ப்பு கேள்விகுறியாகும் என்று குறிப்பிட்ட டாக்டர் ரவீந்திரநாத், அரசு மருத்துவமனைகளில் உள்ள பயிற்சி மருத்துவர்களின் உதவித் தொகையை உயர்த்தி வழங்க வேண்டும் என்றும் அவர் தெரிவித்தார்.