கழகப் பொதுச் செயலாளர் தியாகத்தலைவி சின்னம்மா ஆணைப்படியும், துணைப் பொதுச் செயலாளர் திரு.டிடிவி தினகரன் எம்.எல்.ஏ அறிவுறுத்தலின்படியும், புரட்சித்தலைவர் எம்.ஜி.ஆரின் 101-வது பிறந்தநாள் விழா பொதுக்‍கூட்டம் தமிழகத்தின் பல்வேறு பகுதிகளில் நடைபெற்றன.

தென்சென்னை வடக்கு மாவட்டம், அண்ணா நகர் பகுதிக் கழகம் சார்பில், எம்.ஜி.ஆர். 101-வது பிறந்தநாள் விழா பொதுக்‍கூட்டம் அமைந்தகரையில் நடைபெற்றது. இதில் பங்கேற்ற தென்சென்னை வடக்கு மாவட்டக் கழக செயலாளர் திரு. வி.பி. கலைராஜன், மூன்றாயிரம் பேருக்‍கு வேட்டி, சேலை மற்றும் நலத்திட்ட உதவிகளை வழங்கினார். அண்ணாநகர் பகுதிக்கழக செயலாளர் திரு. கே.என். குணசேகரன் உள்ளிட்ட திரளான கழக நிர்வாகிகள் பங்கேற்ற இக்‍கூட்டத்தில், ஆயிரம் இளைஞர்கள் கழகத்தில் இணைந்தனர்.

ஈரோடு மாநகர் மாவட்டக் கழகம் சார்பில், பவானியில், எம்.ஜி.ஆர். 101- வது பிறந்தநாள் விழா மாபெரும் பொதுக்கூட்டம் நடைபெற்றது. கழக நிர்வாகிகள், தொண்டர்கள் பங்கேற்ற இக்‍கூட்டத்தில், பல்வேறு கட்சிகளிலிருந்து விலகி ஏராளமானோர் கழகத்தில் இணைந்தனர்.

கடலூரில் நடைபெற்ற எம்.ஜி.ஆர். 101-வது பிறந்தநாள் விழா பொதுக்கூட்டத்தில், கழக கொள்கைபரப்பு துணைச் செயலாளர் திரு. நாஞ்சில் சம்பத், கழக அமைப்புச் செயலாளர் திரு. புகழேந்தி உள்ளிட்டோர் பங்கேற்றுப் பேசினர்.