தமிழக மக்கள் நலன் ஒன்றையே தமது உயிர் மூச்சாகக் கொண்டு, மக்கள் நல்வாழ்வுக்காக, தம் வாழ்நாள் முழுவதையும் அர்ப்பணித்து, அரும்பணியாற்றி வந்த, முதலமைச்சர் செல்வி ஜெயலலிதா, நேற்று முன்தினம் இரவு காலமானார். இந்திய குடியரசுத் தலைவர், பிரதமர், மத்திய அமைச்சர்கள் உள்ளிட்ட பெருந்திரளானோர், முதலமைச்சர் உடலுக்கு இறுதி அஞ்சலி செலுத்தினார்கள். முதலமைச்சரின் உடல், முழு அரசு மரியாதையுடன், சென்னை கடற்கரையில், புரட்சித் தலைவர் எம்.ஜி.ஆர். நினைவிடம் அருகே நேற்று மாலை நல்லடக்கம் செய்யப்பட்டது. இறுதி ஊர்வலத்தில் லட்சக்கணக்கான அ.இ.அ.தி.மு.க தொண்டர்களும், பொதுமக்களும் கலந்துகொண்டு, கண்ணீர் அஞ்சலி செலுத்தினர்.

அ.இ.அ.தி.மு.க. பொதுச்செயலாளரும், தமிழக முதலமைச்சருமான செல்வி ஜெ ஜெயலலிதா, சென்னை அப்பலோ மருத்துவமனையில் நேற்று முன்தினம் இரவு 11.30 மணியளவில் காலமானார். முதலமைச்சரின் மறைவை அடுத்து, இந்திய துணைக் கண்டமும், உலகின் ஒட்டுமொத்த தமிழ்ச்சமுதாயமும், மீளாத் துயரில் மூழ்கியுள்ளது. கோடானுகோடி அ.இ.அ.தி.மு.க. தொண்டர்களும், தமிழகத்தின் அனைத்து மக்களும் முதலமைச்சர் செல்வி ஜெயலலிதா மறைவால் தாங்கவொணா துயரத்தில் ஆழ்ந்துள்ளனர்.

முதலமைச்சர் செல்வி ஜெயலலிதாவின் உடல், சென்னை ஓமந்தூரார் அரசினர் தோட்ட வளாகத்தில் உள்ள, ராஜாஜி ஹாலில், பொதுமக்கள் அஞ்சலிக்காக வைக்கப்பட்டது. நேற்று அதிகாலையில் இருந்து, தங்கள் மகத்தான தலைவருக்கு அஞ்சலி செலுத்த பொதுமக்களும், அ.இ.அ.தி.மு.க. தொண்டர்களும் லட்சக்கணக்கில் அணிவகுத்து வந்தனர். இதனால், சென்னை ஓமந்தூரார் அரசினர் தோட்ட வளாகம் மற்றும் அண்ணாசாலை பகுதி முழுவதும், மக்கள் கடலாக காட்சியளித்தது.