கன்னியாகுமரி மாவட்டத்தில் தமிழக அரசின் சிறப்பு மானிய உதவியுடன் முதற்கட்டமாக 15 கிராமங்களில் பயறு உற்பத்தி பயிற்சி முகாம்கள் தொடங்கியுள்ளதால், விவசாயிகள் மகிழ்ச்சியடைந்துள்ளனர்.

முதலமைச்சர் செல்வி ஜெயலலிதா உத்தரவின்படி, குறைந்த செலவில் அதிக பயறு மகசூலை பெறும் வகையில், பல்வேறு சிறப்பு திட்டங்கள் தமிழகத்தில் செயல்படுத்தப்பட்டு வருகின்றன. இதனால் தமிழகத்தில் பயறு வகைகளின் உற்பத்தி கணிசமாக உயர்ந்து வருகிறது. இந்நிலையில், கன்னியாகுமரி மாவட்டத்தில் வேளாண்துறையின் மூலம் முதற்கட்டமாக 15 கிராமங்களில் பயறு உற்பத்தி சிறப்பு முகாம்கள் தொடங்கப்பட்டுள்ளன. நாகர்கோவிலை அடுத்துள்ள எறும்புக்காடு பகுதியில் நடைபெற்ற பயறு சாகுபடி குறித்த பயிற்சி முகாமில் வேளாண்மை துறை அதிகாரிகள் பங்கேற்று சாகுபடி முறைகள், குறைந்த முதலீட்டில் அதிக லாபம் பெறுவது குறித்து விவசாயிகளுக்கு செயல்முறை விளக்கமளித்தனர். மேலும் பயறு சாகுபடி பணிகளையும் தொடங்கிவைத்தனர். மானிய உதவியுடன் பயறு சாகுபடியை ஊக்கப்படுத்தி வரும் முதலமைச்சருக்கு விவசாயிகள் நெஞ்சார்ந்த நன்றி தெரிவித்தனர். கன்னியாகுமரி மாவட்டத்தில் இதுவரை 100 ஹெக்டேர் அளவில் பயறு சாகுபடி பணிகள் முடிவடைந்துள்ளதாகவும், 2 ஆயிரம் ஹெக்டேர் அளவில் சாகுபடி செய்ய இலக்கு நிர்ணயிக்கப்பட்டுள்ளதாகவும் மாவட்ட வேளாண்துறை அதிகாரி திரு.சந்திரசேகரன் தெரிவித்தார்.