மேட்டூர் அரசு மருத்துவமனையில் கண்புரை அறுவை சிகிச்சையின்போது தொற்று ஏற்பட்டு பாதிக்கப்பட்ட 23 பேர் முற்றிலுமாக குணமடைய, முதலமைச்சர் செல்வி ஜெயலலிதா உத்தரவுப்படி, தொடர்ந்து சிகிச்சை அளிக்கப்பட்டு வருவதாகவும், அதற்கான செலவு மட்டுமின்றி பாதிக்கப்பட்டோரின் குடும்பச்செலவையும் தமிழக அரசு ஏற்றுக்கொண்டுள்ளதாக சட்டப்பேரவையில் தெரிவிக்கப்பட்டது.

சட்டப்பேரவையில் இன்று கவன ஈர்ப்பு தீர்மானத்திற்கு பதிலளித்த சுகாதாரத்துறை அமைச்சர் டாக்டர் சி. விஜயபாஸ்கர், அறுவை சிகிச்சையால் கண்பார்வை பாதிக்கப்பட்டவர்களுக்கு முதலமைச்சர் செல்வி ஜெயலலிதா உத்தரவுப்படி, உயர்சிகிச்சை அளிக்கப்பட்டு வருவதாகவும், அவர்களில் 2 பேர் முழுமையாக கண்பார்வை பெற்றுள்ளதாகவும் தெரிவித்தார். இதேபோல் மற்றவர்களும் விரைவில் குணமடைவார்கள் என அமைச்சர் கூறினார்.

தொடர்ந்து பேசிய அ.இ.அ.தி.மு.க. உறுப்பினர் திரு. செம்மலை, கண்புரை அறுவை சிகிச்சையின் போது பாதிக்கப்பட்டவர்களின் மருத்துவ செலவு மட்டுமின்றி குடும்பச் செலவையும் முதலமைச்சர் செல்வி ஜெயலலிதா உத்தரவுப்படி, தமிழக அரசு ஏற்றுக் கொண்டுள்ளதாக தெரிவித்தார்.