சென்னையில் பேருந்துகளில் கட்டணமில்லா பயணத்திற்கான டோக்கன்கள் பெற்ற 60 வயதிற்கு மேற்பட்டவர்களுக்கு ஜுன் மாதம் முதல் ஆகஸ்ட் வரை 3 மாதங்களுக்கு தலா 10 டோக்கன் வழங்கும் பணி தொடங்கியுள்ளது.

முதலமைச்சர் செல்வி ஜெயலலிதா, சென்னை மாநகர போக்குவரத்து கழக பேருந்துகளில் மூத்த குடிமக்கள் கட்டணமில்லாமல் பயணம் செய்யும் திட்டத்தை கடந்த பிப்ரவரி மாதம் 24-ம் தேதி தொடங்கி வைத்தார். இதனையடுத்து, சென்னையில் உள்ள 60 வயதிற்கும் மேற்பட்ட மூத்த குடிமக்களுக்கு புகைப்பட அடையாள அட்டை மற்றும் பிப்ரவரி முதல் மே மாதம் வரை கட்டணமில்லா பயணத்திற்கான டோக்கன்களும் வழங்கப்பட்டன. இத்திட்டத்தின்கீழ் டோக்கன் பெற்றவர்களுக்கு தற்போது ஜுன், ஜூலை, ஆகஸ்ட் ஆகிய 3 மாதங்களுக்கு தலா 10 டோக்கன்கள் வழங்கப்பட்டு வருகின்றன. மூத்த குடிமக்கள் குடும்ப அட்டை நகல் மற்றும் புகைப்பட அடையாள அட்டை ஆகியவற்றை ஏற்கெனவே டோக்கன் பெற்ற மையங்களில் அளித்து புதிய டோக்கன்களை பெற்றுக்கொள்ளலாம். இதற்காக மாநகர போக்குவரத்துக் கழகம் மூலம் சிறப்பு கவுன்டர்கள் அமைக்கப்பட்டுள்ளன. புதிதாக பயன்பெற விரும்பும் மூத்த குடிமக்கள் அதற்கான படிவத்தை பூர்த்தி செய்து, குடும்ப அட்டையுடன் தங்கள் இருப்பிடத்தின்அருகாமையில் உள்ள போக்குவரத்து கிளை அலுவலகங்களில் பெற்றுக்கொள்ளலாம் என தெரிவிக்கப்பட்டுள்ளது. இத்திட்டத்தின்கீழ் பயனடைந்து வரும் மூத்த குடிமக்கள், முதலமைச்சர் செல்வி ஜெயலலிதாவுக்கு நெஞ்சார்ந்த நன்றி தெரிவித்தனர்.