உதகை தாவரவியல் பூங்காவில் 120-வது மலர்க் கண்காட்சி நாளை தொடங்குகிறது. 5 லட்சம் மலர்ச் செடிகளில் பல வண்ண மலர்கள் பூத்து குலுங்குகின்றன.

நீலகிரி மாவட்டத்தில் கோடை சீசன் களைகட்டியுள்ள நிலையில், சுற்றுலாப் பயணிகளை கவர, தோட்டக்கலைத்துறை சார்பில் பல்வேறு நிகழ்ச்சிகள் நடத்தப்பட்டு வருகின்றன. இதன் ஒரு பகுதியாக அங்குள்ள தாவரவியல் பூங்காவில், 120-வது மலர்க் கண்காட்சி நாளை தொடங்குகிறது. இதனையொட்டி, பூங்காவில் நடவு செய்யப்பட்டுள்ள 194 ரகங்களைக் கொண்ட 5 லட்சம் மலர்ச்செடிகளில் வண்ண மலர்கள் பூத்து குலுங்குகின்றன. மேலும், 15 ஆயிரம் மலர் தொட்டிகளில் பல வகையான வெளிநாட்டு மலர்ச்செடிகள் காட்சிப்படுத்தப்பட்டுள்ளன. இந்த ஆண்டு ஒரு லட்சத்து 30 ஆயிரம் கார்னேசன் மலர்களால் சிட்டுக்குருவிகள் அமைக்கும் பணி நடைபெற்று வருகிறது. இது தவிர 20 அரங்குகளில் பல்வேறு வகை மலர்கள் காட்சிக்கு வைக்கப்பட்டுள்ளன. சுற்றுலாப் பயணிகளின் வருகை அதிகரிக்கக்கூடும் என்பதால், மாவட்ட நிர்வாகமும், தோட்டக்கலையும் பல்வேறு ஏற்பாடுகளை செய்துள்ளது. 120-வது மலர்க்கண்காட்சியை முன்னிட்டு, நாளை உள்ளூர் விடுமுறை அறிவிக்கப்பட்டுள்ளது.