மேற்குவங்க மாநில முதலமைச்சராக இன்று பதவியேற்கவுள்ள செல்வி மம்தா பானர்ஜிக்கு, தமிழக முதலமைச்சர் செல்வி ஜெயலலிதா வாழ்த்து தெரிவித்துள்ளார். பதவியேற்பு விழாவில் கலந்துகொள்ளுமாறு தமக்கு அழைப்பு விடுத்ததற்காக நன்றி தெரிவித்துள்ள முதலமைச்சர் செல்வி ஜெயலலிதா, அரசுப் பணிகள் அதிகமாக உள்ளதால் பதவியேற்பு விழாவில் தம்மால் கலந்துகொள்ள இயலவில்லை என்றும் குறிப்பிட்டுள்ளார்.

தமிழக முதலமைச்சர் செல்வி ஜெ ஜெயலலிதா, மேற்குவங்க மாநில முதலமைச்சர் செல்வி மம்தா பானர்ஜிக்கு, அனுப்பியுள்ள கடிதத்தில், செல்வி மம்தா பானர்ஜி, முதலமைச்சராக இன்று பதவியேற்கும் நிகழ்ச்சியில் கலந்துகொள்ள தமக்கு அழைப்பு விடுத்ததற்காக நன்றி தெரிவித்துக் கொள்வதாகக் குறிப்பிட்டுள்ளார்.

செல்வி மம்தா பானர்ஜி, தொடர்ந்து 2-வது முறையாக மகத்தான வெற்றி பெற்றிருப்பது கொண்டாடப்பட வேண்டிய சாதனை என்றும் முதலமைச்சர் தெரிவித்துள்ளார்.

பதவியேற்பு விழாவில் கலந்துகொண்டு செல்வி மம்தா பானர்ஜிக்கு நேரில் வாழ்த்து தெரிவிக்க தாம் விரும்பியபோதிலும், அரசுப் பணிகள் அதிகமாக இருப்பதால், தம்மால் விழாவில் கலந்து கொள்ள இயலவில்லை என்றும் முதலமைச்சர் செல்வி ஜெயலலிதா குறிப்பிட்டுள்ளார்.

மேற்குவங்க மாநிலத்தை வளர்ச்சிப் பாதையில் முன்னெடுத்துச் செல்லும் பணியில், செல்வி மம்தா பானர்ஜியும், அவரது அமைச்சரவை உறுப்பினர்களும், மேலும் பல சாதனைகளை நிகழ்த்த, தமது மனமார்ந்த வாழ்த்துகளை தெரிவித்துக்கொள்வதாகவும் முதலமைச்சர் செல்வி ஜெயலலிதா குறிப்பிட்டுள்ளார்.