முதலமைச்சர் செல்வி ஜெயலலிதா மேற்கொண்ட தீவிர நடவடிக்கைகளின் காரணமாக, மருத்துவ படிப்புகளுக்கான பொது நுழைவுத் தேர்வு ரத்து செய்யப்பட்டு, மீண்டும் கலந்தாய்வு மூலம் மாணவர் சேர்க்கை நடைபெறவுள்ளதையடுத்து, மகிழ்ச்சியடைந்துள்ள கல்வியாளர்கள், மாணவ - மாணவியர் உள்ளிட்ட பல்வேறு தரப்பினர், முதலமைச்சர் செல்வி ஜெயலலிதாவுக்கு நெஞ்சார்ந்த நன்றி தெரிவித்துள்ளனர்.

தமிழகம் உட்பட பல்வேறு மாநிலங்களில் மருத்துவ படிப்புகளுக்கான மாணவர் சேர்க்கை கலந்தாய்வு மூலம் நடைபெற்று வந்தது. இந்நிலையில், நாடுமுழுவதும் பொது நுழைவுத் தேர்வு மூலம் மாணவர் சேர்க்கை நடைபெற வேண்டும் என உச்சநீதிமன்றம் உத்தரவு பிறப்பித்திருந்தது. இந்த உத்தரவினால் கிராமப்புற மாணவர்கள் கடுமையாக பாதிக்கப்படுவார்கள் என கருத்து தெரிவித்திருந்த முதலமைச்சர் செல்வி ஜெயலலிதா, இடஒதுக்கீட்டின் அடிப்படையில் நடைபெறும் கலந்தாய்வு மூலமே மாணவர் சேர்க்கை நடைபெற வேண்டும் என வலியுறுத்தி, பிரதமருக்கு முதலமைச்சர் செல்வி ஜெயலலிதா அண்மையில் கடிதம் எழுதியிருந்தார். அதன் தொடர்ச்சியாக, மாணவர் சேர்க்கை தொடர்பாக, மத்திய அமைச்சரவை இயற்றிய அவசர சட்டத்திற்கு குடியரசுத் தலைவர் ஒப்புதல் வழங்கியுள்ளார். இதனையடுத்து, இந்த ஆண்டு வழக்கம்போல மருத்துவ படிப்புக்கான மாணவர் சேர்க்கை கலந்தாய்வு மூலமேநடைபெறவுள்ளது. முதலமைச்சர் செல்வி ஜெயலலிதாவின் தீவிர நடவடிக்கைகளின் காரணமாகவே பொது நுழைவுத் தேர்வு ஒத்திவைக்கப்பட்டு, கலந்தாய்வு மூலம் மாணவர் சேர்க்கைக்கு அனுமதி கிடைத்துள்ளதாக கல்வியாளர்கள் உள்ளிட்ட பல்வேறு தரப்பினர் மகிழ்ச்சியுடன் தெரிவித்தனர். மேலும், முதலமைச்சர் செல்வி ஜெயலலிதாவுக்கு நெகிழ்ச்சியுடன் அவர்கள் பாராட்டும் தெரிவித்துள்ளனர்.

இதேபோல், அரியலூர் மாவட்டத்தைச் சேர்ந்த மாணவர், மாணவியர் மற்றும் பெற்றோர் முதலமைச்சர் செல்வி ஜெயலலிதாவுக்கு நெஞ்சார்ந்த நன்றி தெரிவித்துள்ளனர்.