முதலமைச்சர் செல்வி ஜெயலலிதா ஆணைக்கிணங்க, தமிழ்நாடு குடிசை மாற்று வாரியம் மூலம், கோவையில் நலிந்த பிரிவு உள்ளிட்ட அனைத்து தரப்பு மக்களுக்கும் தேவையான வீடுகள் கட்டிதரப்பட்டுள்ளன. இதனால் பயனடைந்துள்ள மக்கள் முதலமைச்சருக்கு தங்கள் நெஞ்சார்ந்த நன்றியை தெரிவித்துள்ளனர்.

தமிழ்நாடு குடிசை மாற்று வாரியம் மூலம், கோவையில் நலிந்த பிரிவு உள்ளிட்ட அனைத்து தரப்பு மக்களுக்கும் தேவையான வீடுகள், கோவை மாநகராட்சிக்கு சொந்தமான 20 ஏக்கர் நிலப்பரப்பில் கட்டிதரப்படும் என முதலமைச்சர் செல்வி ஜெயலலிதா, கடந்த 2014-ம் ஆண்டு ஆகஸ்ட் 24-ம் தேதி அறிவித்தார். முதலமைச்சர் செல்வி ஜெயலலிதா அறிவித்ததன்படி 443 கோடியே 55 லட்சம் ரூபாய் மதிப்பீட்டில், உக்கடம், அண்ணாநகர், மலைநகர், மலுவிச்சம்பட்டி, கீரநத்தம் ஆகிய பகுதிகளில் 2,912 வீடுகள் தமிழ்நாடு குடிசை மாற்று வாரியம் மூலமாக ஏழை எளிய மக்களுக்கு கட்டித்தரும் பணிகள் தீவிரமாக நடைபெற்று வருகின்றன. அவற்றில் கட்டி முடிக்கப்பட்ட வீடுகள், பயனாளிகளிடம் ஒப்படைக்கப்பட்டுள்ளன. மழைக்காலங்களில் சாலையோரங்களிலும், ஆற்றங்கறைகளிலும், வெள்ள அபாயத்துடன் வசித்து வந்த தங்களுக்கு அடுக்குமாடி குடியிருப்பு கட்டிதந்து, வாழ்க்கையின் அத்தியாவசிய தேவையை பூர்த்தி செய்து கொடுத்த முதலமைச்சருக்கு பயனாளிகள் நன்றி தெரிவித்துள்ளனர். மேலும், வாழ்க்கைத் தரத்தை உயர்த்திய முதலமைச்சர் செல்வி ஜெயலலிதாவுக்கே என்றென்றும் தங்கள் ஆதரவு என்றும் உறுதிபட தெரிவித்துள்ளனர்.