முன்னாள் மத்திய அமைச்சர் ப.சிதம்பரத்தின் மகன் கார்த்தி சிதம்பரத்தின் வீடு மற்றும் அலுவலகங்களில் அமலாக்கப் பிரிவு மற்றும் வருமான வரித்துறையினர் அதிரடி சோதனை மேற்கொண்டுள்ளனர்.

ஏர்செல் நிறுவன அதிபர் சிவசங்கரனை மிரட்டி அதன் பங்குகளை மலேசிய நிறுவனத்திற்கு முறைகேடாக விற்பனை செய்த விவகாரத்தில், தி.மு.க. முன்னாள் மத்திய அமைச்சர் தயாநிதிமாறன் மற்றும் அவரது சகோதரரும், சன்குழும நிறுவனங்களின் தலைவருமான கலாநிதிமாறன் ஆகியோரை அமலாக்கப்பிரிவு கடந்த ஆண்டு டிசம்பர் மாதம் விசாரணை மேற்கொண்டது. முறைகேட்டின் மூலம் கிடைத்த அவர்களது 700 கோடி ரூபாய் சொத்துகளையும் முடக்கியது. இந்த நிலையில், ப.சிதம்பரத்தின் மகன் கார்த்தி சிதம்பரம், ஏர்செல் மேக்சிஸ் விவகாரத்தில் நடைபெற்ற முறைகேட்டில் ஆதாயம் பெற்றதாக, அமலாக்கப்பிரிவு கண்டுபிடித்ததை அடுத்து, கார்த்தி சிதம்பரத்திற்கு சொந்தமான நிறுவனத்தின் 2 இயக்குநர்கள் மீது அமலாக்கப்பிரிவு சம்மன் அனுப்பியது. இந்நிலையில், ஏர்செல் மேக்சிஸ் விவகாரத்தில் ஏற்பட்ட முறைகேடு தொடர்பாக, முன்னாள் மத்திய அமைச்சர் ப.சிதம்பரத்தின் மகன் கார்த்தி சிதம்பரத்தின் வீடு மற்றும் அலுவலகங்களில் அமலாக்கப் பிரிவு மற்றும் வருமான வரித்துறையினர் இன்று அதிரடி சோதனை மேற்கொண்டுள்ளனர். சென்னை ஆழ்வார்பேட்டையில் உள்ள கார்த்தி சிதம்பரத்தின் வீடு, அலுவலகம் மற்றும் கார்த்தி சிதம்பரத்தின் நெருங்கிய டாக்டர் வீட்டிலும் சோதனை நடைபெற்று வருகிறது.