திருப்பூர் மாவட்டம் பல்லடம் பகுதியில் குத்தகைக்கு வீடு பிடித்து தருவதாக கூறி 40 க்கும் மேற்பட்ட நபர்களிடம் லட்சக்கணக்கில் பணம் மோசடி செய்த இருவர் கைது செய்யப்பட்டனர்.

பல்லடத்தை சேர்ந்த ரியல் எஸ்டேட் புரோக்கரான நவாஸ் என்பவர் அப்பகுதியில் கட்டி முடிக்கப்பட்ட நிலையில் உள்ள ஒரே வீட்டை, தன்னிடம் வீடு கேட்டு வரும் பல பேருக்கு காண்பித்து குத்தகைக்கு எனக்கூறி, லட்சக்கணக்கில் பணம் பெற்றுள்ளார். 40க்கும் மேற்பட்டவர்கள் ஒரு லட்சம் ரூபாயிலிருந்து 3 லட்சம் ரூபாய் வரை நேரிலும், நவாஸின் பல்வேறு வங்கிக் கணக்குகளிலும் பணம் செலுத்தியுள்ளனர். அவர் ஏற்கெனவே இதுபோல் பலரிடம் பணத்தை பெற்றுக்கொண்டு கம்பி நீட்டுவதை வழக்கமாக கொண்டிருந்தார்.

இந்த விவரம் தெரிந்ததால் ஏமாந்த பலரும் அவரை தீவிரமாக தேடினர். இந்நிலையில் திருப்பூர் கருவம்பாளையம் பகுதியில் பதுங்கியிருந்த அவரை பாதிக்கப்பட்ட நபர்கள் பிடித்து போலீசில் ஒப்படைத்தனர். பின்னர் வீட்டின் உரிமையாளராக நடித்த ரங்கராஜ் என்பவரும் கைது செய்யப்பட்டார். தங்கள் பணத்தை பெற்றுத்தர போலீஸ் நடவடிக்கை எடுக்க வேண்டும் என பாதிக்கப்பட்டவர்கள் கேட்டுக் கொண்டுள்ளனர்.