திருச்சியில், வீட்டின் பூட்டை உடைத்து, 105 சவரன் நகைகளை கொள்ளையடித்து சென்ற மர்ம நபர்களை போலீசார் தீவிரமாக தேடி வருகின்றனர்.

திருச்சி உறையூர் ராமலிங்க நகரை சேர்ந்த செந்தில்நாதன் என்பவர், அபுதாபியில் பொறியாளராக பணியாற்றி வருகிறார். அவரது மனைவி கனிமொழி மற்றும் 3 குழந்தைகள், ராமலிங்க நகரில் உள்ள வீட்டில் வசித்து வருகின்றனர். சீர்காழியில் உள்ள தனது தாயார் வீட்டிற்கு கடந்த 1 ஆம் தேதி புறப்பட்டு சென்ற கனிமொழி, இன்று தனது வீட்டிற்கு திரும்பினார். அப்போது கதவின் பூட்டு உடைக்கப்பட்டிருந்ததை கண்டு அதிர்ச்சியடைந்த அவர், வீட்டிற்குள் சென்று பார்த்த போது, பீரோவில் வைக்கப்பட்டிருந்த 105 சவரன் தங்க நகை மற்றும் 70 ஆயிரம் ரூபாய் ரொக்கம் கொள்ளையடிக்கப்பட்டிருந்தது தெரியவந்தது. இதுகுறித்த புகாரில், கைரேகை நிபுணர்கள் மற்றும் மோப்ப நாயுடன் நேரில் சென்ற போலீசார், தடயங்களை சேகரித்தனர். கொள்ளை நடந்த வீட்டில் சிசிடிவி பொருத்தப்பட்டிருந்த நிலையில், ஹார்ட் டிஸ்க்கையும் கொள்ளையர்கள் எடுத்து சென்று விட்டதாக கூறப்படுகிறது.

திருச்சி பொன்னகரில் ஏற்கெனவே ஒரு கொள்ளை சம்பவம் அரங்கேறியதன் பரபரப்பு முடிவதற்குள் மற்றொரு சம்பவம் நடந்திருப்பது, திருச்சி நகர மக்கள் மத்தியில் அச்சத்தை ஏற்படுத்தியுள்ளது.