தமிழகத்தில் முழு ஊரடங்கு கடைபிடிக்கப்படும் நிலையில், இன்று முகூர்த்த நாள் என்பதால், மதுரை திருப்பரங்குன்றம் கோயில் வாசலில், எளிமையாக திருமணங்கள் நடைபெற்றன.

முருகனின் அறுபடை வீடுகளில் முதல்படை வீடான திருப்பரங்குன்றம் சுப்பிரமணிய சுவாமி திருக்கோயிலில், முகூர்த்த நாளன்று ஏராளமான திருமணங்கள் நடைபெறுவது வழக்கம். இந்நிலையில், கொரோனாவை கட்டுப்படுத்த, வெள்ளி, சனி, ஞாயிற்று கிழமைகளில் வழிபாட்டு தலங்களில் பக்தர்கள் வழிபாடு மேற்கொள்ள தடை விதிக்கப்பட்டுள்ளது. மேலும், இன்று முழு ஊரடங்கும் கடைபிடிக்கப்படுகிறது. இதனால், திருப்பரங்குன்றம் கோயில் வாசலில், எளிமையான முறையில் திருமணங்கள் நடைபெற்றன. திருமண நிகழ்ச்சியில், முகக்கவசம் அணிந்து, சமூக இடைவெளியை கடைபிடித்தபடி, மணமக்களின் உறவினர்கள் பங்கேற்றனர்.

இதேபோல், சென்னை திருவொற்றியூர் வடிவுடையம்மன் கோயில் முன், எளிமையாக திருமணங்கள் நடைபெற்றன. ஒரு சிலர், தங்கள் வீடுகளிலேயே எளிமையாக திருமணங்களை நடத்தினர். இதில் கலந்து கொண்ட உறவினர்கள், கொரோனா விதிமுறைகளை கடைபிடித்து, மணமக்களை வாழ்த்தி சென்றனர்.