அம்மா உணவகம் தொடர்ந்து செயல்படும் என கூறி வரும் திமுக அரசு, இத்திட்டத்தை முடக்கும் முயற்சியாக, ஆட்குறைப்பு செய்வதைக் கண்டித்து, பாதிக்கப்பட்ட ஊழியர்கள் அண்ணா அறிவாலயத்தை முற்றுகையிட்டு போராட்டத்தில் ஈடுபட்டனர்.

தமிழகத்தில் ஏழை எளிய மக்களுக்கு குறைந்த விலையில் தரமான உணவு வழங்க வேண்டுமென, கடந்த 2013-ம் ஆண்டு மாண்புமிகு அம்மாவால் தொடங்கப்பட்ட "அம்மா உணவகம்", பல மாநிலங்களுக்கு முன்னோடியாக அமைந்தது. சென்னை மாநகராட்சியில் மட்டும் 207 அம்மா உணவகங்கள் அமைக்கப்பட்டன. தி.மு.க. ஆட்சி பொறுப்பேற்ற உடனே, சென்னை முகப்பேர் பகுதியில் உள்ள அம்மா உணவகம் சூறையாடப்பட்டது. அம்மா உணவகம் திட்டம் மாற்றப்படாது என தி.மு.க. அரசு வெளிப்படையாக கூறினாலும், மறைமுகமாக இத்திட்டத்தினை முடக்கும் முயற்சியில் ஈடுபட்டு வருகிறது. அம்மா உணவகத்திற்கு தரமற்ற உணவுப்பொருட்கள் வழங்கப்படுவதாக பரவலாக குற்றச்சாட்டு எழுந்த நிலையில், ஆட்குறைப்பு நடவடிக்கைகள் மேற்கொள்ளப்படுவதாக ஊழியர்கள் குற்றம் சாட்டியுள்ளனர். இதனை கண்டித்து, சென்னை தேனாம்பேட்டையில் அண்ணா அறிவாலய வாசலில் அம்மா உணவக ஊழியர்கள் போராட்டத்தில் ஈடுபட்டனர்.