பொதிகை தொலைக்காட்சியில் சமஸ்கிருத செய்தி ஒளிபரப்புக்கு தடை விதிக்க, சென்னை உயர்நீதிமன்ற மதுரைக்கிளை மறுப்பு தெரிவித்துள்ளது.

பொதிகை தொலைக்காட்சியில், கடந்த டிசம்பர் 1-ம் தேதி முதல், தினமும் 15 நிமிடங்கள் சமஸ்கிருத செய்தி அறிக்கை ஒளிபரப்பப்படுமென, அறிவிப்பு வெளியிடப்பட்டது. இதனை எதிர்த்து, மதுரையைச் சேர்ந்த முத்துக்குமார் என்பவர், வழக்கு தொடர்ந்திருந்தார். தமிழகத்தில் 15 நிமிட சமஸ்கிருத செய்தி அறிக்கையை கட்டாயமாக நடைமுறைப்படுத்தியுள்ளது ஏற்கத்தக்கதல்ல என்றும், இந்த உத்தரவுக்கு இடைக்காலத் தடை விதிக்க வேண்டும் எனவும், அவரது மனுவில் கோரப்பட்டிருந்தது. இந்த வழக்கை விசாரித்த தலைமை நீதிபதி சஞ்சிப் பானர்ஜி, நீதிபதி எம்.எம்.சுந்தரேஷ் ஆகியோர் அடங்கிய அமர்வு, மனுதாரருக்கு தேவையில்லை எனில் தொலைக்காட்சியை அணைத்து வைத்துக் கொள்ளலாம், அல்லது வேறு சேனலை மாற்றிக்கொள்ளலாம் எனக் கண்டனம் தெரிவித்தனர். இதனை விட பல முக்கியமான பிரச்சனைகள் உள்ளதாகத் தெரிவித்த நீதிபதிகள், தேவையெனில், சம்பந்தப்பட்ட அதிகாரிகளிடம் மனு அளித்து மனுதாரர் நிவாரணம் தேடிக்கொள்ளலாம் எனவும் கூறி, வழக்கை முடித்து வைத்தனர்.