சிவில் சர்வீஸ் தேர்வில் வெற்றிபெற்ற மதுரையை சேர்ந்த பார்வையற்ற மாற்றுத்திறனாளி மாணவிக்கு ஐஏஎஸ் பணியிடம் மறுக்கப்பட்டுள்ளதற்கு விளக்கம் கேட்டு மத்திய அரசுக்கு நிர்வாகத் தீர்ப்பாயம் நோட்டீஸ் அனுப்பியுள்ளது.

மதுரை மணிநகரத்தைச் சேர்ந்தவர் எம்.பூரணசுந்தரி என்ற பார்வையற்ற மாற்றுத் திறனாளி கடந்த 2019-ல் 4-வது முறையாக சிவில் சர்வீஸ் தேர்வு எழுதி, அகில இந்திய அளவில் 286-வது இடத்தைப் பிடித்து வெற்றி பெற்றார். இவருக்கு இந்திய வருவாய்ப் பணி- வருமான வரி பணியிடம் ஒதுக்கப்பட்டுள்ளது. இதற்கிடையில் தனக்கு ஐஏஎஸ் பணியிடம் ஒதுக்கக் கோரி மத்திய நிர்வாகத் தீர்ப்பாயத்தின் சென்னைக் கிளையில் பூரண சுந்தரி மனுத் தாக்கல் செய்தார். அதில், ஓபிசி இட ஒதுக்கீடு மற்றும் மாற்றுத்திறனாளிகள் உரிமைச் சட்டப்படி, தனக்கு ஐஏஎஸ் பணியிடம் வழங்கியிருக்க வேண்டும். ஆனால், ஐஆர்எஸ் பணியிடம் வழங்கப்பட்டுள்ளதாக குறிப்பிட்டுள்ளார். ஓபிசி பிரிவில் தன்னை விடக் குறைவாக மதிப்பெண்கள் பெற்றவர்களுக்கு ஐஏஎஸ் பணியிடம் வழங்கப்பட்டுள்ளதாக பூரணசுந்தரி கூறியிருந்தார். இந்த மனுவை மத்திய நிர்வாகத் தீர்ப்பாயக் கிளையின் தலைவர் மற்றும் நிர்வாக உறுப்பினர் ஆகியோர் விசாரித்தனர். அப்போது 2019-ம் ஆண்டின் சிவில் சர்வீஸ் தேர்வில் வெற்றி பெற்றவர்களுக்குப் பணி ஒதுக்கீடு செய்து மத்திய அரசு கடந்த செப்டம்பர் 25 ஆம் தேதி வெளியிட்டுள்ள பட்டியல், இந்த வழக்கின் இறுதித் தீர்ப்புக்குக் கட்டுப்பட்டது என உத்தரவிட்டு, விசாரணையை ஜனவரி 22-ம் தேதிக்குத் தீர்ப்பாயம் ஒத்தி வைத்தது.