லடாக் எல்லைக்கு இராணுவ தளவாடங்களை ஏற்றிச் சென்ற போது வாகனம் விபத்தில் பலியான தேனி மாவட்டத்தை சேர்ந்த அழகுராஜனின் உடல், இராணுவ மரியாதையுடன் சொந்த ஊரில் அடக்கம் செய்யப்பட்டது.

தேனி மாவட்டம், குச்சனூர் அருகே உள்ள துரைசாமிபுரத்தைச் சேர்ந்தவர்அழகுராஜன். இவர் ஒடிசா மாநிலம் புவனேஷ்வரில் ராணுவப் பிரிவு ஓட்டுனராகப் பணியாற்றி வந்துள்ளார். கடந்த 9 ஆம் தேதி புவனேஷ்வரில் இருந்து ராணுவத் தளவாடங்களை வாகனத்தில் ஏற்றிக் கொண்டு லடாக் முகாமிற்கு அழகு ராஜா சென்றபோது, வாகனம் விபத்தில் சிக்கியது. இதில், அவர் சம்பவ இடத்திலேயே உயிரிழந்தார். அழகுராஜாவின் உடல் இன்று அதிகாலை அவரது சொந்த ஊரான குச்சனூர் துரைசாமிபுரத்திற்கு கொண்டு வரப்பட்டு உறவினர்கள் மற்றும் பொதுமக்கள் அஞ்சலிக்கு வைக்கப்பட்டது. பின்னர் அவரது உடல் ஊர்வலமாக மயானத்துக்கு எடுத்து செல்லப்பட்டது. அங்கு ஊர் மக்கள் அனைவரும் ஒன்று கூடி ஒரு நிமிடம் மௌன அஞ்சலி செலுத்தினர். தொடர்ந்து இராணுவ மரியாதையுடன் உடல் அடக்கம் செய்யப்பட்டது.