சென்னையில் உள்ள அரசு ராஜீவ் காந்தி மருத்துவமனையில் பணியாற்றி வந்த தலைமை செவிலியர் பிரிசில்லா கொரோனா பாதிப்பின் காரணமாக உயிரிழந்த நிலையில், அவர் கொரோனாவால் இறக்கவில்லை என்று மருத்துவமனை நிர்வாகம் கூறியுள்ளது அதிர்ச்சியை ஏற்படுத்தியுள்ளது.

சென்னை ராஜீவ்காந்தி அரசு பொது மருத்துவமனையில் தலைமை செவிலியராக பணிபுரிந்து வந்தவர் பிரிசில்லா. இவரது பணி கடந்த மார்ச் மாதத்துடன் ஓய்வு பெற இருந்த நிலையில், தமிழகஅரசின் புதிய அறிவிப்பு காரணமாக மேலும் ஒரு வருடம் பணி நீட்டிப்பு பெற்றார். கடந்த 24ம் தேதி முதல் கொரோனா வார்டில் அவர் சிகிச்சைப் பெற்று வந்த நிலையில், கடந்த 26ம் தேதி உயிரிழந்தார். அவரது இறப்பிற்கு கொரோனாவே காரணம் என பலரும் குற்றம் சாட்டிவரும் நிலையில், கொரோனா பாதிப்பால் ஜோன் மேரி பிரிசில்லா இறக்கவில்லை என கூறி அவரது உடலை, குடும்பத்தாரிடமே அளித்துவிட்டோம் என்று மருத்துவமனை நிர்வாகம் தெரிவித்துள்ளது. செவிலியர் பிரிசில்லாவுக்கு ஏற்கெனவே நீரிழிவு நோய், சிறுநீரகம் செயலிழப்பு மற்றும் இதய கோளாறு போன்ற நோய்கள் இருந்தன. அதனால்தான் அவர் உயிரிழந்தார் என்று மறுத்துள்ளது. கோரோனா விவகாரத்தில் மாநில அரசின் முன்னுக்குப் பின் முரணான செயல்பாடுகள் மக்களிடையே, அதிருப்தியையே ஏற்படுத்தி உள்ளது.