பிரசாத் ஸ்டுடியோவிலிருந்து தன்னை வெளியேற்றக்கூடாது எனக்கோரி, இசையமைப்பாளர் இளையராஜா தொடர்ந்த வழக்கை, 2 வாரத்திற்குள் முடித்துவைக்கும்படி கீழமை நீதிமன்றத்திற்கு சென்னை உயர்நீதிமன்றம் உத்தரவிட்டுள்ளது.

இசையமைப்பாளர் இளையராஜா சென்னை சாலிகிராமத்தில் உள்ள பிரசாத் ஸ்டூடியோவில் இருந்துதான், 40 ஆண்டுகளுக்கும் மேலாக தனது இசையமைப்பு பணிகளை மேற்கொண்டு வந்தார். இந்த நிலையில், பிரசாத் ஸ்டுடியோவிலிருந்து இளையராஜா வெளியேற வேண்டும் என ஸ்டுடியோ நிர்வாகம் தெரிவித்திருந்தது. இட உரிமை தொடர்பாக வழக்கு ஏற்கனவே சிட்டி சிவில் நீதிமன்றத்தில் நிலுவையில் உள்ளது. இட உரிமை தொடர்பாக போதுமான ஆவணங்கள் தாக்கல் செய்தும், சிட்டி சிவில் நீதிமன்றம் எந்த இடைக்கால உத்தரவும் பிறப்பிக்கவில்லை எனவும், நிலுவையில் உள்ள வழக்கை விரைந்து முடிக்க உத்தரவிட வேண்டும் என்றும் இளையராஜா சென்னை உயர்நீதிமன்றத்தில் வழக்கு தொடர்ந்திருந்தார். இந்த வழக்கை உயர்நீதிமன்றம் சமரச தீர்வு மையத்திற்கு அனுப்பியது. ஆனால் சமரச மையத்தில் இருதரப்பு பேச்சுவார்த்தை தோல்வி அடைந்தது.

இந்த வழக்கு இன்று மீண்டும் உயர்நீதிமன்றத்தில், விசாரணைக்கு வந்தது. வழக்கை விசாரித்த நீதிபதி பாரதிதாசன், இந்த பிரச்சினை தொடர்பாக சிவில் நீதிமன்றத்தில் நிலுவையில் உள்ள வழக்கை இரண்டு வாரத்துக்குள் முடித்து, உத்தரவு பிறப்பிக்கும்படி தீர்ப்பளித்தார்.