மாண்புமிகு அம்மாவைப் பற்றி அவதூறு பேசியது தொடர்பான வழக்‍கில் தே.மு.தி.க. தலைவர் திரு. விஜயகாந்துக்‍கு சென்னை உயர்நீதிமன்றம் கடும் கண்டனம் தெரிவித்துள்ளது.

கடந்த 2012ம் ஆண்டு தேனியில் நடைபெற்ற பொதுக் கூட்டத்தில் பேசிய திரு. விஜயகாந்த், அப்போதைய முதலமைச்சர் அம்மாவை விமர்சித்து பேசியதாக, தமிழக அரசு தரப்பில், தேனி நீதிமன்றத்தில் அவதூறு வழக்கு தொடரப்பட்டது.

இதுதொடர்பாக தமிழக அரசு பிறப்பித்த அரசாணையை ரத்து செய்யக் கோரி திரு. விஜயகாந்த் தரப்பில் தாக்கல் செய்யப்பட்ட மனுவை உயர்நீதிமன்ற தனி நீதிபதி தள்ளுபடி செய்து உத்தரவிட்டிருந்தார்.

இதை எதிர்த்து திரு. விஜயகாந்த் தரப்பில் சென்னை உயர்நீதிமன்றத்தில் தாக்கல் செய்யப்பட்ட மேல் முறையீட்டு மனு, தலைமை நீதிபதி திரு. ஏ.பி.சாஹி மற்றும் நீதிபதி திரு. சுப்பிரமணியம் பிரசாத் ஆகியோர் அடங்கிய அமர்வில் இன்று விசாரணைக்கு வந்தது. அப்போது, எதிர்க்கட்சி தலைவராக இருந்தபோது திரு. விஜயகாந்த் பேசிய பேச்சுகள் அவதூறானவையே என தெரிவித்த நீதிபதிகள், அரசியல் சூழ்நிலைகளைப் பற்றி விவாதிக்க நீதிமன்றத்தில் இடமில்லை எனக்‍ கூறினர்.

எதிர்க்கட்சிகள் எப்படி செயல்பட வேண்டும் என குடியரசு துணைத்தலைவர் ஏற்கெனவே தெரிவித்துள்ளதையும் சுட்டிக்காட்டிய நீதிபதிகள், விஜயகாந்த் தரப்பில் தாக்கல் செய்யப்பட்ட மனுவை தள்ளுபடி செய்து உத்தரவிட்டனர்.