ராமநாதபுரம் மாவட்டம் பரமக்குடியில் மூளை சாவு அடைந்த இளைஞரின் உடல் உறுப்புகள் ஏழு பேருக்கு தானமாக அளிக்கப்பட்டது.

பரமக்குடியை அடுத்த காந்தி நகரைச் சேர்ந்தவர் சரத்குமார். இவர் சிவகங்கையில் பணிபுரிந்துவிட்டு இருசக்‍கர வாகனத்தில் வீடு திரும்பிக்‍ கொண்டிருந்தபோது, நிலை தடுமாறி கீழே விழுந்ததில், தலையில் பலத்த காயம் ஏற்பட்டதாகக்‍ கூறப்படுகிறது. உடனடியாக அவர் மருத்துவமனையில் அனுமதிக்‍கப்பட்டு அறுவை சிகிச்சை செய்யப்பட்டது. ஆனால், சிகிச்சை பலன் அளிக்‍கவில்லை என்றும், சரத்குமார் மூளைச்சாவு அடைந்ததாகவும் மருத்துவர்கள் தெரிவித்தனர். இதனையடுத்து, சரத்குமாரின் உடல் உறுப்புகளை தானம் செய்ய அவரது பெற்றோர் முன்வந்ததால், மருத்துவமனை நிர்வாகம் சரத்குமாரின் எட்டு உடல் உறுப்புகளை ஏழு பேருக்கு தானமாக வழங்க ஏற்பாடு செய்தது. மகன் இறந்த நிலையிலும் மற்றவர்கள் நலனுக்காக உடல் உறுப்புக்களை தானம் செய்த சரத்குமாரின் பெற்றோருக்கு, உடல் உறுப்பை தானம் பெற்றவர்களும், பொதுமக்களும் நன்றி தெரிவித்தனர்.