ஈராக்கிலிருந்து இன்று சென்னை திரும்பிய, ஆந்திரா மற்றும் தெலங்கானாவைச் சேர்ந்த 36 பேர், விமானம் மற்றும் ரயில் மூலம் ஹைதராபாத் செல்ல நடவடிக்கை மேற்கொண்ட, முதலமைச்சர் செல்வி ஜெயலலிதாவுக்கு, தொழிலாளர்கள் நெஞ்சார்ந்த நன்றி தெரிவித்தனர்.

ஈராக்கில் உள்நாட்டுப் போர் உச்சக்கட்டத்தை எட்டியதால், அங்கு சிக்கித் தவித்த தமிழர்களை மீட்க முதலமைச்சர் செல்வி ஜெயலலிதா, மத்திய அரசு மூலம் தீவிர நடவடிக்கை மேற்கொண்டார். அதன் காரணமாக, ஏற்கெனவே தூத்துக்குடி செவிலியர் மற்றும் கட்டட தொழிலாளர்கள் பத்திரமாக மீட்கப்பட்டு, தமிழக அரசு செலவில் சொந்த ஊர்களுக்கு அனுப்பி வைக்கப்பட்டனர். இந்நிலையில், ஈராக்கிலிருந்து ஆந்திரா மற்றும் தெலங்கானாவைச் சேர்ந்த 36 பேர் இன்று, சென்னை விமான நிலையம் வந்தடைந்தனர். அவர்களில் 21 பேர் விமானம் மூலம் ஹைதராபாத்துக்கும், 15 பேர் ரயில் மூலமாக விஜயவாடாவுக்கும் அனுப்பி வைக்கப்பட்டனர். தமிழக அரசின் செலவில் சொந்த ஊர்களுக்கு அனுப்பி வைக்க நடவடிக்கை மேற்கொண்ட, முதலமைச்சர் செல்வி ஜெயலலிதாவுக்கு, தங்கள் நெஞ்சார்ந்த நன்றி தெரிவித்தனர்.