தமிழகத்தின் பல்வேறு பகுதிகளில் பரவலாக தொடர்ந்து மழை பெய்து வருகிறது. இதனால், நீர்நிலைகளில் நீர்மட்டம் கணிசமாக உயர்ந்து வருகிறது.

சென்னை உட்பட தமிழகத்தின் பல்வேறு பகுதிகளில் கடந்த சில வாரங்களாக தொடர்ந்து மழை பெய்து வருகிறது. சென்னை நகரில் மாலை நேரங்களில் விட்டுவிட்டு மழை பெய்கிறது. மதுரை மாவட்டத்தின் பல்வேறு பகுதிகளில் நேற்று 2 மணி நேரத்திற்கும் மேலாக மழை பெய்தது. உசிலம்பட்டி, சோழவந்தான் உள்ளிட்ட இடங்களிலும், மாநகரில் ஆனையூர், எல்லிஸ்நகர், கோரிப்பாளையம் உள்ளிட்ட பகுதிகளிலும் மழை பெய்ததால், மக்கள் மகிழ்ச்சி அடைந்தனர்.

ஈரோடு மாவட்டத்தில் தலமலை, நெய்தானபுரம், கோடிபுரம் உள்ளிட்ட இடங்களில் நேற்று பலத்த மழை பெய்தது. பயிரிடப்பட்டுள்ள மக்காச்சோளம், கேழ்வரகு உள்ளிட்ட பயிர்களுக்கு இந்த மழை உகந்ததாக இருக்கும் என விவசாயிகள் மகிழ்ச்சி தெரிவித்தனர்.

இதேபோல், நாமக்கல்லில், ராசிபுரம், கொல்லிமலை, புதுசத்திரம் உள்ளிட்ட இடங்களிலும் மழை பெய்தது. தமிழகத்தில் பெய்து வரும் தொடர் மழையால், நீர் நிலைகளில் நீர்மட்டம் அதிகரித்து வருகிறது.

இதனிடையே, வடதமிழகத்தில் இன்று கனமழை பெய்ய வாய்ப்புள்ளதாக வானிலை ஆய்வுமையம் தெரிவித்துள்ளது.